Ғарбий Соҳилда Фаластин президенти Маҳмуд Аббоснинг карвони ўққа тутилди. Аббоснинг қўриқчиларидан бири отиб ўлдирилган ва ҳужумни “Абу Жандал ўғиллари” гуруҳи ўз зиммасига олган. Бу ҳақда Туркиянинг Sabah ва Milliyet нашри хабар берди.
Хабарга кўра, “Абу Жандал ўғиллари” Маҳмуд Аббосга Исроилга қарши чора кўриши учун 24 соат муҳлат берган. Белгиланган муддат тугаши билан 7 ноябрь куни Аббоснинг кортежига ҳужум уюштирилган. Тўқнашувда Аббоснинг тансоқчиларидан бири отиб ўлдирилган.
Аббос 5 ноябрь куни Ғарбий Соҳилда АҚШ давлат котиби Энтони Блинкен билан кутилмаган учрашув ўтказди. Блинкен билан учрашувда Аббос Исроилдан Ғазога ҳужумларини тўхтатишни сўради. Сиёсатчилар ўртасидаги учрашув бир соатдан кам давом этган.
“Ғазо секторидаги Фаластин халқимиз Исроил ҳарбий машинаси томонидан, халқаро ҳуқуқ тамойилларини ҳисобга олмасдан, бошдан кечирган геноцид ва вайронагарчиликни таърифлашга сўзим йўқ”, — деди Аббос Блинкен билан учрашувда.
Блинкен эса фаластинликлар мажбуран кўчирилиши керак эмаслигини айтган ва Вашингтон мустақил Фаластин давлатини барпо этиш интилишларини рўёбга чиқариш учун “ҳаракат қилишга содиқ” эканини билдирган. Бироқ АҚШ давлат котиби ўт очишни тўхтатиш ҳақида сўз очмаган.
Изоҳ (0)