To‘qqiz oy ichida O‘zbekiston hududlari orasida Toshkent shahriga eng ko‘p chet ellik ko‘chib keldi. Bu haqda Statistika agentligi maʼlumot berdi.
Qayd etilishicha, 2023-yil yanvar–sentyabr oylarida O‘zbekistonga xorijdan ko‘chib kelganlar soni 168,7 ming kishini tashkil etdi. Shundan 70,1 ming nafari erkaklar, 98,6 ming nafari ayollar. Ko‘chib kelganlar soni shahar joylarda 131,3 ming kishini, qishloq joylarda 37,4 ming kishini tashkil etgan.
Mamlakatga xorijiy davlatlardan ko‘chib kelganlarning asosiy qismi Rossiya (38,9 foiz), Qozog‘iston (24,5 foiz), Tojikiston (10,5 foiz), Qirg‘iziston (5,1 foiz), Turkmaniston (1,6 foiz) va boshqa mamlakatlar (19,4 foiz) hissasiga to‘g‘ri kelgan.
Hududlar bo‘yicha ko‘chib kelish darajasi Toshkent shahrida eng yuqorisi bo‘lib, to‘qqiz oy ichida poytaxtga 73 ming 532 nafar xorijlik ko‘chgan. Qolgan hududlarga kelgan chet elliklar soni quyidagicha:
- Qoraqalpog‘iston — 6 473 nafar;
- Andijon — 5 081 nafar;
- Buxoro — 6 029 nafar;
- Jizzax — 4 765 nafar;
- Qashqadaryo — 6 936 nafar;
- Navoiy — 8 155 nafar;
- Namangan — 2 017 nafar;
- Samarqand — 8 653 nafar;
- Surxondaryo — 7 817 nafar;
- Sirdaryo — 4 865 nafar;
- Toshkent — 21 579 nafar;
- Farg‘ona — 6 919 nafar;
- Xorazm — 5 901 nafar.
Maʼlum qilinishicha, to‘qqiz oy davomida ko‘chib kelganlarning 82,8 foizi mehnatga layoqatli yoshdagilar hisoblanadi. Qolgan 9,4 foizi mehnatga layoqatli yoshdan kichiklar, 7,8 foizi mehnatga layoqatli yoshdan kattalardir.
Ko‘chib kelganlarning o‘sish surʼati eng yuqori darajasi Buxoro, Samarqand, Navoiy, Xorazm viloyatlari hamda Qoraqalpog‘istonda kuzatildi.
Izoh (0)