Хорижликлар яшаш учун Ўзбекистоннинг қайси ҳудудига кўпроқ кўчиб келаётгани маълум қилинди

Тўққиз ой ичида Ўзбекистон ҳудудлари орасида Тошкент шаҳрига энг кўп чет эллик кўчиб келди. Бу ҳақда Статистика агентлиги маълумот берди.

Қайд этилишича, 2023 йил январь–сентябрь ойларида Ўзбекистонга хориждан кўчиб келганлар сони 168,7 минг кишини ташкил этди. Шундан 70,1 минг нафари эркаклар, 98,6 минг нафари аёллар. Кўчиб келганлар сони шаҳар жойларда 131,3 минг кишини, қишлоқ жойларда 37,4 минг кишини ташкил этган.

Мамлакатга хорижий давлатлардан кўчиб келганларнинг асосий қисми Россия (38,9 фоиз), Қозоғистон (24,5 фоиз), Тожикистон (10,5 фоиз), Қирғизистон (5,1 фоиз), Туркманистон (1,6 фоиз) ва бошқа мамлакатлар (19,4 фоиз) ҳиссасига тўғри келган.

Ҳудудлар бўйича кўчиб келиш даражаси Тошкент шаҳрида энг юқориси бўлиб, тўққиз ой ичида пойтахтга 73 минг 532 нафар хорижлик кўчган. Қолган ҳудудларга келган чет элликлар сони қуйидагича:

• Қорақалпоғистон — 6 473 нафар;
• Андижон — 5 081 нафар;
• Бухоро — 6 029 нафар;
• Жиззах — 4 765 нафар;
• Қашқадарё — 6 936 нафар;
• Навоий — 8 155 нафар;
• Наманган — 2 017 нафар;
• Самарқанд — 8 653 нафар;
• Сурхондарё — 7 817 нафар;
• Сирдарё — 4 865 нафар;
• Тошкент — 21 579 нафар;
• Фарғона — 6 919 нафар;
• Хоразм — 5 901 нафар.

Маълум қилинишича, тўққиз ой давомида кўчиб келганларнинг 82,8 фоизи меҳнатга лаёқатли ёшдагилар ҳисобланади. Қолган 9,4 фоизи меҳнатга лаёқатли ёшдан кичиклар, 7,8 фоизи меҳнатга лаёқатли ёшдан катталардир.

Кўчиб келганларнинг ўсиш суръати энг юқори даражаси Бухоро, Самарқанд, Навоий, Хоразм вилоятлари ҳамда Қорақалпоғистонда кузатилди.