“Дайди” қўшиғи билан мухлислар эътиборига тушган хонанда Дилноз Ҳакимова илк марта оиласи, отаси ва унга билдирилган номақбул таклифлар ҳақида гапирди.
— Онам ички ишлар ходимаси бўлиб, қатъий иш тартибида ишлайдиган аёл бўлган. Оилада учта қизмиз, икки синглим тил соҳаси бўйича ўқишяпти. Бакалавр босқичини якунлаб, магистратурани Италияда ўқишни режа қилишяпти. Кўпчилик тошкентлик деб билар экан, аммо мен Фарғонада туғилиб ўсганман. Санъаткор бўлишимни мендан ҳам кўра кўпроқ онам истаган. Тўртинчи синфимда ўқиётганимда Қўқонда яхши студия бор эди. Эринмай, ишидан жавоб сўраб ўша ерга олиб келарди. Отам ҳақида кўп сўрашган, аммо шахсий ҳаётим ҳақида тўхталишни унчалик ёқтирмайман. Отам бор, аммо оталик меҳрини кўпроқ бобомдан олганман. Отам билан муносабатларимиз у қадар яқин бўлмаган, аммо ҳамма масалада бобомга суянолганмиз. Яқинда ота ҳақида қўшиқ айтдим. Тўғриси, бу мавзуда куйлаб бунчалик йиғлайман, деб ўйламагандим, — дейди Дионоз Ҳакимова.
Журналист Гўзал Муҳаммедова хонандани очиқ либосларни кийишда айблади.
— Чиройли ва замонавий кийинишни яхши кўраман. Аммо менинг ҳам ўз услубим ва меъёрим бор. Либосларим у қадар очиқ эмас, меъёрга ҳамиша амал қиламан, — деб жавоб берди хонанда.
Кўпчилик санъат вакиллари номақбул таклифлар беришгани ҳақида гапиришади. Хонанда Дилноз ҳам бундай таклифлар беришгани ва у ўзидан хафа бўлгани ҳақида айтиб ўтди.
— Афсуски, бундай таклифлар бўлиб туради. Аммо биринчи марта эшитганимда жуда қийин вазиятга тушганман. Яъни “Нега менга бу гапни айтишга ҳадди сиғди, нимада хато қилдим?” деб ўз-ўзимни койиганман. Кейин тушундимки, баъзи инсонларга имконият яратмасангиз ҳам, ғаразли таклифини беришга ҳаракат қилиб кўради. Дипломатик йўл билан “Раҳмат, мен сиз ўйлаган инсон эмасман”, деб вазиятдан чиқишни ўргандим. Продюсерликни таклиф қилишади-ю, кетидан “сизни ҳам ёқтириб қолдим”, деб қўшиб қўйишади. Шоу-бизнес принципларимдан кечишимга арзимайди. Мен бу қозонда қайнаш учун ўзлигимни ўзгартирмайман, — дейди Дилноз Ҳакимова.
Изоҳ (0)