O‘zbekiston xalq artisti Munojot Yo‘lchiyeva Madaniyat vazirligi tomonidan o‘tkazilgan davra suhbatida ko‘p gaplar og‘izda qolib ketayotgani, konsert berish uchun “Xalqlar do‘stligi” sanʼat saroyida kun ololmagani haqida kuyinib gapirdi.
— Bog‘cha yoshidan boshlab bolalarga mumtoz qo‘shiqlarni tushuntirishimiz kerak, deb ko‘p gapirdik. Hatto buning uchun mablag‘lar ham ajratildi. U ish davom etayaptimi, yo‘qmi? Bog‘cha tarbiyalanuvchilari tugul, katta odamlar ham har kuni maʼnosiz qo‘shiqni eshitsa, beixtiyor uni ayta boshlaydi. Bog‘chalarga “jikir-jikir” maʼnosiz qo‘shiqlarni emas, xalq qo‘shiqlari yoki maqom ashulalarini qo‘yib qo‘yishsa, maʼnaviy did shakllanib boradi.
Keyin mualliflik huquqini tiklash borasida ham ko‘p gapirdik. Ming afsuski, hozirgi to‘ylarda umuman qo‘shiq aytishni bilmaydigan, drama teatri aktrisalari Yulduz Usmonova yoki Zulayho Boyhonovaning qo‘shiqlarini aytib, non yeyapti. Topgan daromadidan muallifga besh so‘m pul ham bermaydi. “Yalla” ansamblining qo‘shiqlarini aytib, koshona uyda yashayotganlar yo‘q deb o‘ylaysizmi? Surishtirib borsak, o‘shalarning hech biri “Sizning qo‘shig‘ingiz bilan tirikchilik qilyapman”, deb 100 AQSH dollari berib, rozilik ham so‘ramagan. Qonun chiqarilyapti, ammo uning bajarilayotganini ham nazoratga olish kerak.
Katta sahnalardagi konsertlarga taklif etishadi. Bitta konsertga 20 tadan ortiq sanʼatkorni taklif etishadi. Keyin hammaga vaqt yetishi kerak deb qo‘shiqning u yeridan, bu yeridan kesib tashlashadi. Men roziman, bunday konsertlarga taklif etishmasin. Ammo 10 ta sanʼatkor 5-10 daqiqa davom etadigan qo‘shig‘ini to‘liq ijro etsin va bundan tinglovchi ham zavqlansin. O‘zbekiston kunlari munosabati bilan Tojikistonga borganimizda ular “Sarohbori oromijon” ashulasini 8 daqiqa davomida ijro etishdi. Tomoshabinlar ham maza qilib tinglashdi. Bizda esa ashulaning u yeridan, bu yeridan kesib, uning ustiga fonogrammada aytilishi uyat emasmi?!
Men “Xalqlar do‘stligi” sanʼat saroyida konsert beraman, deb borsam bo‘sh kun yo‘q, deyishdi. Hamma egallab bo‘lgan. Men ham pul ishlashni, konsert berishni xohlayman. O‘n kunlab konsert berishga mening ham kuchim yetadi. Ammo saroy direktori yoki hokimiyatdagilar egallab olishgan. Ular bilan men borib, urishib kelishim kerakmi, sizlar nazoratga olinglar. Yoki sanʼatdan ketishimiz yoki uni rivojlantirishimiz kerak, — deydi Munojot Yo‘lchiyeva.
Izoh (0)