Anvar Sanayevning “Oh, sevgilim” va “Tor ko‘cha” kliplari orqali tomoshabinlarga tanish bo‘lgan Botir Mo‘minov ayni kunlarda nimalar bilan band? Nega u ekranlarda ko‘rinmay qolgan?
— Hozirgi O‘zbekiston davlat sanʼat va madaniyat institutining Televideniye rejissorligi bo‘limida tahsil olganman. Bolalikdan ekranda ko‘rinishni orzu qilganman. U paytlari katta hajmdagi videokameralar bo‘lardi. Ota-onamdan shunday kamera olib berishlarini iltimos qilganman. Selfi videolarni suratga olishni o‘sha vaqtda boshlagan ekanman. Menda sanʼat borasida hech qanday tasavvur bo‘lmagan. “Qaysi institutda o‘qisam, televizorga olib chiqishadi”, deb so‘raganimda sanʼat oliygohida o‘qishimni tavsiya qilishgan. Institutga kirgan kunimoq televideniyega kelib, mashhurlarning kelishini poylardim. Ko‘pchilikdan rad javobini olganman, faqatgina Burhon Sharopov sanʼat institutida o‘qishimni bilib, yordam berishga qaror qilgan. Uning yordami bilan “Salom yoshlar” va “7 dan 70 gacha” ko‘rsatuvlarida boshlovchilik qilganman. Ustozim Anvar Sanayev bilan tanishganimda ham talaba edim, — deydi Botir Mo‘minov.
U Anvar Sanayev bilan qilingan hamkorlik muvaffaqiyatli kechgani va unga mashhurlik keltirganini so‘zlab berdi.
— Kliplar ham ommalashib, ko‘chada yurolmay qolgan kunlarim bo‘lgan. Ayniqsa, viloyatlarga borganda, xonandaga bo‘lgan eʼtibor qanday bo‘lsa, mendan ham kelib dastxat so‘rashardi. Andijondagi stadionda konsert berilyotganda juda qiziq voqea sodir bo‘lgan. Anvar aka “Sahnaga taklif etsam chiqasanmi?”, deb so‘ragan. Men klipda rol ijro etgan bo‘lsam, odamlar qanday kutib olisharkan, deb hayron bo‘lganman. Ammo reaksiya shu qadar kuchli bo‘lganki, hayron qolganmiz. Ustozimning nafaqat kliplarida suratga tushganman, balki ularning ko‘pchiligiga rejissorlik ham qilganman, — deydi Botir Mo‘minov.
Botir Mo‘minov ayni kunlarda nimalar bilan band, nega ekranlarda ko‘rinmay qoldi? Aktyor bu savolga quyidagicha javob berdi.
— Ochig‘ini aytsam, rejissorlar sizga rol bor deyishadi-yu, jiddiy taklif berishmaydi. Hammasi gap-da. Agar jiddiy takliflar bo‘lsa, albatta, rol ijro etgan bo‘lardim. Shu bois bor eʼtiborimni klip va konsert rejissorligiga qaratganman. Bir muddat qozog‘istonlik rejissorlar bilan ham ishladim. Turkiyadagi loyihalarda ham ishtirok etdim. Hozirgi kunda kliplardan tashqari, reklama roliklari ham suratga olyapman, — deydi Botir Mo‘minov.
Izoh (0)