Ўзбекистонда 2024 йилда бюджет ходимларининг иш ҳақи, пенсия ва стипендиялар миқдорини ошириш режалаштирилмоқда. Бу Иқтисодиёт ва молия вазирлиги томонидан эълон қилинган 2024—2026 йиллар учун Бюджетномада келтирилган.
Унда 2024–2026 йиллардаги бюджет сиёсати концепциясининг асосий йўналишлари келтирилган. Шулардан бири аҳоли турмуш даражасини ошириш ҳамда фуқароларнинг реал даромадлари ўсишини таъминлаш мақсадида иш ҳақи ва пенсия миқдорларини ошириб боришдир.
Бюджетномада келтирилишича, келгуси йилда иш ҳақи, пенсия ва стипендиялар миқдорини ошириш учун давлат бюждетидан харажатлар 20,5 фоизга, ёки 26,94 триллион сўмга ортиши кутилмоқда. Бу давлат бюджети барча харажатларининг 50 фоиздан ортиғини ташкил этади. Хусусан, Пенсия тўловлари учун харажатлар 9,28 триллион сўмга (+17,2 фоиз) жами 63,13 триллион сўмга ошади.
Ҳужжатда келтирилишича, 2023 йил охиригача шаклланган инфляция миқдори йил давомида бюджет ташкилотлари ходимларининг иш ҳақи ва пенсия миқдорларининг оширилган фоизларидан юқори бўлган тақдирда, келгуси молия йилининг январь ойидан иш ҳақи ва пенсияларни ушбу фоизларга ошириш орқали компенсация қилиш тартиби жорий этилади.
2024 йил учун Давлат бюджети тўғрисидаги қонун лойиҳасида республика бюджетидан биринчи даражали бюджет маблағларини тақсимловчиларига ажратиладиган маблағларнинг чекланган миқдорлари келтирилган бўлиб, унга кўра келгуси йилда иш ҳақи, пенсиялар, стипендиялар ва нафақалар миқдорларини ва айрим хизматларнинг тарифларини ошириш билан боғлиқ харажатларга 9,55 триллион сўм ажратиш кўзда тутилган.
Эслатиб ўтамиз, 1 апрелдан пенсия ва нафақалар, 1 майдан эса ойликлар 7 фоизга ошганди. Пенсия, нафақа ва давлат сектори ходимларининг маошларини 1 сентябрдан яна 10 фоизга (қўшимча 5,6 триллион сўм) ошириши режалаштирилганди. Аммо бюджет тақчиллиги ортгани сабаб бу қарор кейинга қолдирилди.
Аввалроқ Ўзбекистонда 2024 йилда давлат идоралари бюджетдан қанча маблағ олиши эълон қилинганди.
Изоҳ (0)