Prezident Shavkat Mirziyoyev 24-oktyabr kuni Qarshi tumani markazi — Beshkent shahridagi 12-maktabga rejadan tashqari tashrif buyurdi. Bu haqda “Menimcha” ko‘rsatuvida ma’lum qilindi.
Qayd etilishicha, 1968-yilda qurilgan ushbu maktabda 1,4 ming nafar o‘quvchi tahsil olmoqda, ularga 100 dan ortiq o‘qituvchilar dars beradi. Maktab binosi bundan ikki yil oldin kapital taʼmirdan chiqqan. Taʼlim muassasasi 1,6 koeffitsiyent bilan ishlaydi.
Ushbu maktabdagi qurib-qaqshab yotgan stadionni va hovliga pala-partish ekilgan o‘simliklarni ko‘rib, davlat rahbarining taʼbi xira bo‘lgan.
“Bu sening ishing-ku, viloyat hokiminiki emas-ku, qara”, — dedi davlat rahbari tuman hokimiga.
Shundan so‘ng prezident “O‘qituvchilar xonasi”ga kirgan va bu yerdagi sharoitlar ham davlat rahbarini qoniqtirmagan. Prezident maktabga “raqamlashtirish jarayoni hali yetib kelmagani va hammasi eski uslubda ekanini”, bunday sharoitda hozirgi yoshlarni bilim olishga qiziqtirib bo‘lmasligini aytgan.
Shavkat Mirziyoyev, shuningdek, maktablarning qurilish standartlarini ham qayta ko‘rib chiqish kerakligini taʼkidladi. Shu yerning o‘zida mutasaddilarga savol bilan yuzlandi:
“Senga bitta savol: shu turgan joyimizda qurilishda eng katta xato nima?” — deb so‘radi. So‘ngra bosh vazir o‘rinbosari Ochilboy Ramatovga “Bilasanmi, yozda issiq, qishda sovuq bo‘ladi. Men Samarqand viloyati hokimi bo‘lganimda o‘zim hamma [maktablardagi] oynani g‘ishtlab, yopib tashlaganman. Hammasini yopish kerak. Mayli, to‘rtta emas, bitta [derazaning ko‘zi]qolsin. Buni isitib bo‘ladimi? Mana bu beton, agar [deraza] yopilmasa, bu yer hech qachon isimaydi”, — dedi prezident.
Shavkat Mirziyoyev hududlar rivoji bilan tanishish maqsadida 24-oktyabr kuni Qashqadaryo viloyatiga borgandi. Prezident u yerda dastlab Sulton Tex Group klasteri to‘qimachilik korxonasi faoliyati bilan tanishdi, Qarshi shahrida yangidan bunyod etilgan markaziy qozonxonani borib ko‘rdi, shuningdek, 2024-yilda Qashqadaryo viloyatiga 1 mlrd dollar investitsiya jalb qilinishi kerakligini aytdi.
Izoh (0)