Президент Шавкат Мирзиёев 24 октябрь куни Қарши тумани маркази — Бешкент шаҳридаги 12-мактабга режадан ташқари ташриф буюрди. Бу ҳақда “Менимча” кўрсатувида маълум қилинди.
Қайд этилишича, 1968 йилда қурилган ушбу мактабда 1,4 минг нафар ўқувчи таҳсил олмоқда, уларга 100 дан ортиқ ўқитувчилар дарс беради. Мактаб биноси бундан икки йил олдин капитал таъмирдан чиққан. Таълим муассасаси 1,6 коэффициент билан ишлайди.
Ушбу мактабдаги қуриб-қақшаб ётган стадионни ва ҳовлига пала-партиш экилган ўсимликларни кўриб, давлат раҳбарининг таъби хира бўлган.
“Бу сенинг ишинг-ку, вилоят ҳокиминики эмас-ку, қара”, — деди давлат раҳбари туман ҳокимига.
Шундан сўнг президент “Ўқитувчилар хонаси”га кирган ва бу ердаги шароитлар ҳам давлат раҳбарини қониқтирмаган. Президент мактабга “рақамлаштириш жараёни ҳали етиб келмагани ва ҳаммаси эски услубда эканини”, бундай шароитда ҳозирги ёшларни билим олишга қизиқтириб бўлмаслигини айтган.
Шавкат Мирзиёев, шунингдек, мактабларнинг қурилиш стандартларини ҳам қайта кўриб чиқиш кераклигини таъкидлади. Шу ернинг ўзида мутасаддиларга савол билан юзланди:
“Сенга битта савол: шу турган жойимизда қурилишда энг катта хато нима?” — деб сўради. Сўнгра бош вазир ўринбосари Очилбой Раматовга “Биласанми, ёзда иссиқ, қишда совуқ бўлади. Мен Самарқанд вилояти ҳокими бўлганимда ўзим ҳамма [мактаблардаги] ойнани ғиштлаб, ёпиб ташлаганман. Ҳаммасини ёпиш керак. Майли, тўртта эмас, битта [деразанинг кўзи]қолсин. Буни иситиб бўладими? Мана бу бетон, агар [дераза] ёпилмаса, бу ер ҳеч қачон исимайди”, — деди президент.
Шавкат Мирзиёев ҳудудлар ривожи билан танишиш мақсадида 24 октябрь куни Қашқадарё вилоятига борганди. Президент у ерда дастлаб Sulton Тех Group кластери тўқимачилик корхонаси фаолияти билан танишди, Қарши шаҳрида янгидан бунёд этилган марказий қозонхонани бориб кўрди, шунингдек, 2024 йилда Қашқадарё вилоятига 1 млрд доллар инвестиция жалб қилиниши кераклигини айтди.
Изоҳ (0)