Taniqli xonanda va aktrisa Jennifer Lopes turmush o‘rtog‘i Ben Afflek bilan Los-Anjelesdan yangi uy sotib olishga qaror qilganlaridan keyin Lopes Bel-Eyrda joylashgan uyini sotuvga qo‘ydi. 1300 kvadrat metrlik joyni egallagan hashamatli uy 35 million AQSH dollariga sotildi.
Jennifer Lopes bu uyni 2016-yilda 28 million AQSH dollari evaziga aktrisa Sila Uord va uning turmush o‘rtog‘i, tadbirkor Govard Shermandan xarid qilgan edi.
Ko‘chmas mulkning yopiq hovlisi 1300 kvadrat metrlik joyni egallagan. Uyda 9 ta yotoqxona mavjud, ichki interyer fransuz uslubiga xos elementlar bilan bezatilgan.
Uyda, shuningdek, kinoteatr, bar, yog‘och panellar bilan qoplangan kutubxona ham bor. Hovli hududida esa mehmonlar uchun kottej, basseyn, golf maydonchasi, barbekyu hududi, 100 kishilik ochiq amfiteatr, organik tomorqa va hattoki qumli plyaj, maxsus dush hamda kichik ko‘l ham joylashgan.
Uy taniqli meʼmor Semyuel Marks tomonidan loyihalashtirilgan bo‘lib, binolarning toshdan ishlangan tashqi qismida fransuz qishloqlariga xos elementlarni ko‘rish mumkin. Asosiy qavatdan shiftlari baland mehmonxona, bar, kamin va hovlidagi ayvonga chiqish yo‘li joy olgan. Yotoqxonalarning bir qismi, shuningdek, barcha turdagi zamonaviy texnikalar bilan jihozlangan va nonushta qilish uchun maxsus hudud ajratilgan bosh oshxona ham asosiy qavatda joylashgan.
Pastki qavatdagi 30 kishilik kinozal do‘stlar davrasidagi bazmlar uchun mukammal darajada mos keladi. Uyning ikkinchi qavatida esa kutubxona, ishlash uchun maxsus xona, garderob, uqalash xonasi va mehmonlar uchun yotoqxona joylashgan.
Izoh (0)