“Yalala bobo” termasi bilan ko‘zga tashlangan Elyorbek Meliboyev bir so‘m tikmasdan, folklor qo‘shiq va gitara bilan mashhurlikka erishayotgani haqida (video)

Zo‘r TV kanalidagi “Artist” loyihasi yosh iste’dod sohiblarini kashf qilishda davom etmoqda. Loyiha ishtirokchisi Elyorbek Meliboyevning “Yalala bobo” deb nomlangan termasi bugun ko‘pchilikning tiliga tushgan.

Ko‘rsatuv hakamlaridan biri bo‘lgan Munisa Rizayeva Elyorbek Meliboyevni o‘zining prodyuserlik markaziga taklif qilgani ham katta shov-shuvlarga sabab bo‘ldi.

“Daryo” muxbiri Feruz Muhammad Elyorbek Meliboyev bilan suhbatda uning Munisa Rizayevaning taklifiga munosabati, “Artist”dan keyingi ijodi va shou-biznesga qancha pul sarflayotganiga qiziqdi.

“Artist” loyihasiga kelishimiz juda qiziq bo‘lgan. Pandemiya sababli “Artist” loyihasining bo‘lib o‘tishi uzoqqa cho‘zilib ketdi. Bu loyiha haqida Ozodbek Nazarbekovning Instagram sahifasi orqali xabar topganman. Shu e’lon bo‘yicha loyihaga o‘zimni videomni jo‘natdim. Oradan yarim yilcha vaqt o‘tgach, “Siz ‘Artist’ loyihasiga o‘tdingiz”, degan xabar keldi. Keyin ellikta ishtirokchining o‘rtasida kasting bo‘lib o‘tdi.

Bu ishtirokchilar haqqoniy tanlab olingani uchun juda kuchli raqiblar yig‘ilgandi. Ishtirokchilar deyarli barcha usullarda, ko‘plab tillarda professional kuylash mahoratiga ega ijodkorlar.

Biror marta musiqiy loyihalarga qatnashmaganim uchun juda ikkilandim. “Yalala bobo”ni aytganimda, bu kichkina asar deb, bu qo‘shiqni aytishimga ko‘pchilik qarshi bo‘lgan. Hammaning fikrini olib, eroncha qo‘shiq aytadigan bo‘ldim.

Syomka kuni texnik nosozlik sabab gitarani ovoz kuchaytirgichga ulay olmadim, ozgina janjal bilan sahnadan chiqib ketdim. Loyiha prodyuseri sahna orqasiga o‘tib turishimni, ikkita ishtirokchidan so‘ng yana chiqishimni, aytdi.

Sahna orqasida kuzatib tursam, hamma chet tilida qo‘shiq aytyapti, “men o‘zbek tilida qo‘shiq aytaman”, deb sahnaga chiqdim. “Yalala bobo”ni aytdim. Bu qo‘shiqni muxlislar juda ham yaxshi kutib oldi. “Yalala bobo”ning orqasidan to‘satdan folklor va ozarbayjoncha qo‘shiqlarni ulab ketdim. Qarasam Munisa Rizayeva va Ozoda Nursaidovalar hayrat bilan tinglashmoqda. Juda quvondim. Bu terma sahnani o‘zida kuylangan, avvaldan reja qilingan terma bo‘lmagan.

Elyorbek Meliboyev, xonanda

“Artist”da Elyorbek Meliboyev “Yalala bobo” popurisini kuylaganidan so‘ng, xonanda Munisa Rizayeva unga prodyuserlik markaziga qabul qilishini aytgan edi. Elyorbek Munisa Rizayevaning ushbu taklifi haqida gapirdi.

Munisa Rizayeva o‘zining “prodyuserlik markaziga qabul qilaman”, degandi. Menimcha borsam yo‘q, demasalar kerak. Lekin hozirgi vaqtda prodyuser bilan ishlash niyatim yo‘q. Munisa Rizayeva menga prodyuserlik taklif qilgani juda ma’qul keldi. Odamlar orasida bu taklif bizni qaysidir ma’noda ommalashtirdi. U inson ellikta ishtirokchining ichida bitta menga shunday taklif bergani va birinchi chiqishimdayoq ular tomonidan bu taklif bo‘lgani meni juda ham xursand qildi, motivatsiya berdi. Ammo hali ularning taklifiga ha yoki yo‘q javobini bermadim.

Elyorbek Meliboyev, xonanda

Suhbat davomida Elyorbek Meliboyev shou-biznesga qancha pul sarf qilayotganiga ham to‘xtalib o‘tdi.

“Kundalik xarajatlarni aytmaganimda shu vaqtgacha deyarli hech qancha pul sarflamadim. Yurtdoshlarimiz yaxshi kunlariga, xizmatlarga ko‘p chaqirmoqda. Masalan, may oyida 9 kun syomka ishlarimiz bor edi. Faqat shu kunlarda xizmatga chiqa olmadik, boshqa kunlarimiz xizmatlar bilan band qilingan”, — deydi xonanda.