AOKAda o‘tkazilgan brifingda “Issiqlik elektr stansiyalari” AJ axborot xizmati rahbari Muhammadjon Bekmuhammedov maʼlum qilishicha, joriy kuz-qish mavsumi davomida 27,6 mlrd kVt/soat elektr energiyasi ishlab chiqarish rejalashtirilgan.
Elektr energiyasi ishlab chiqarish ko‘rsatkichlariga asosan joriy yil yakuniga qadar jamiyat tomonidan 53,8 mlrd kVt/soat elektr energiyasi ishlab chiqarilishi rejalashtirilgan, bunda reja ko‘rsatkichi 102 foizga bajarilib 1,0 mlrd kVt/soat ortiqcha elektr energiya ishlab chiqarilishi belgilangan.
2023–2024-yillar kuz-qish mavsumida aholining elektr va issiqlik energiyasiga bo‘lgan talabini qondirish va mavsumni betalafot o‘tkazish maqsadida tizimli chora-tadbirlar amalga oshirilib, bugungi kungacha elektr stansiyalar belgilangan rejaga muvofiq mavsumga shay holatga keltirildi.
Joriy yilda mavsumga tayyorgarlik ko‘rish rejasiga muvofiq, jami 53 ta energoqurilmada, jumladan, 12 ta energoblok, 31 ta qozon qurilmasi, 9 ta bug‘-gaz qurilmasi va 1 ta gaz-turbina qurilmasida mukammal, o‘rta va joriy taʼmirlash ishlari rejalashtirilgan edi.
Kuz-qish mavsumiga tayyorgarlik bo‘yicha jami 53 ta energoqurilmadan bugungi kunga qadar 46 tasida (87 foiz) belgilangan rejaga muvofiq taʼmir ishlari yakunlandi va 7 ta energoqurilmada taʼmir ishlari jadval asosida davom ettirilmoqda. Ushbu energoqurilmalarda taʼmirlash ishlari 15-noyabrga qadar elektr energiya ishlab chiqarish rejasiga taʼsir qilmagan holda to‘liq yakunlanib, foydalanishga topshirilishi belgilangan.
Taʼmir ishlari sifatli bajarilishini taʼminlash maqsadida mahalliy mutaxassislar qatori AQSHning General Electric, Rossiyaning “Siloviye mashini”, “Kalujskiy turbinniy zavod” va “Taganrogskiy kotelostroitelniy zavod”, Yaponiyaning Mitsubishi Hitachi Power Systems, Janubiy Koreyaning Hyundai konsorsiumi vakillari ham jarayonlarga jalb etildi.
Toshkent issiqlik markazi tizimidagi 3- va 5-son issiqlik markazlarida har birining quvvati 100 Gkall bo‘lgan 4 ta qozon qurilmalari rekonstruksiya qilish orqali zaxira yoqilg‘isi bo‘lgan mazutga moslashtirildi hamda Toshkent shahar Chilonzor tumanidagi “Oqtepa” va “Bog‘zor” MFYda kogeneratsiya qurilmalari ishga tushirildi.
Issiqlik elektr stansiyalaridagi 35-110-220- 500 kV ochiq taqsimlash qurilmalari uskunalarining texnik holatini tekshirish maqsadida
- 586 ta tok transformatorida,
- 171 ta kuchlanish transformatorida,
- 5 ta avtotransformator,
- 1025 ta ajratgichlarda
sinash va sozlash ishlari bajarilib, aniqlangan nuqsonlar bartaraf etildi.
2023-yil noyabr—dekabr oylarida kunlik o‘rtacha 158 mln kVt/soat hamda 2024-yil yanvar—mart oylarida kunlik o‘rtacha 160 mln kVt/soat elektr energiyasi ishlab chiqarish rejalashtirilgan.
Buning uchun jami 6,3 mlrd kub metr tabiiy gaz, 820 ming tonna mazut, hamda 670 ming tonna ko‘mir sarflanishi kutilmoqda.
Mavsumga puxta hozirlik ko‘rish maqsadida yoqilg‘ini qabul qilish, saqlash va undan foydalanish tizimi texnik nazoratdan o‘tkazilib, aniqlangan kamchiliklar bartaraf etilib, mavsumga shay holatga keltirildi”, — deya xabar qildi Muhammadjon Bekmuhammedov.
Izoh (0)