AQSH prezidenti Jo Bayden Kongressga Ukrainaga bir yilga 61,4 milliard dollar, shuningdek, Isroil mudofaasini mustahkamlash uchun 14,3 milliard dollar miqdorida moliyaviy yordam ko‘rsatish bo‘yicha so‘rov yuborgandi. Kongress Vakillar palatasiga yangi spiker saylanmagunga qadar qo‘shimcha moliyalashtirishni amalga oshira olmaydi.
CNN’ning qayd etishicha, Oq uyning so‘rovi Vakillar palatasidagi respublikachilar o‘z yetakchisini aniqlab olmaguncha noaniqligicha qoladi: spikersiz palata budjet bo‘yicha qonunlarni qabul qila olmaydi. Bundan tashqari, telekanalning aniqlik kiritishicha, Ukrainani moliyaviy qo‘llab-quvvatlayotgan Amerika aholisi tobora kamayib borayotganida administratsiyani qiyin ahvolga solib qo‘yadi.
21-oktyabr kuni ertalab Vakillar palatasi ovoz berishning uchinchi bosqichidan keyin yana yangi spikerni saylay olmadi. 194 nafar respublikachi Jim Jordan nomzodini qo‘llab-quvvatlagan. Uning raqibi, demokrat Hakim Jyeffris esa 210 ovoz olgan. Spikerlik lavozimini egallash uchun kamida 217 ovoz to‘plash talab etiladi.
Endi Vakillar palatasi 23-oktyabr kuni yangi nomzodlarni muhokama qilishga qaytadi. Kongressmenlar 29-oktyabrgacha yangi nomzod ko‘rsatishi kerak.
2022-yil fevralidan beri AQSH boshqa G‘arb davlatlari bilan birgalikda Ukrainaga harbiy va moliyaviy yordam ko‘rsatmoqda. Vashington Kiyevni qurol-yarog‘ va o‘q-dorilar bilan ta’minlaydi. 15-oktyabr kuni AQSH prezidentining milliy xavfsizlik bo‘yicha yordamchisi Jeyk Sallivan Qo‘shma Shtatlar Ukraina va Isroilga yana 2 milliard dollardan ortiq yordam ajratish bo‘yicha kelishib olishni rejalashtirayotganini aytdi.
Izoh (0)