АҚШ президенти Жо Байден Конгрессга Украинага бир йилга 61,4 миллиард доллар, шунингдек, Исроил мудофаасини мустаҳкамлаш учун 14,3 миллиард доллар миқдорида молиявий ёрдам кўрсатиш бўйича сўров юборганди. Конгресс Вакиллар палатасига янги спикер сайланмагунга қадар қўшимча молиялаштиришни амалга ошира олмайди.
CNNънинг қайд этишича, Оқ уйнинг сўрови Вакиллар палатасидаги республикачилар ўз етакчисини аниқлаб олмагунча ноаниқлигича қолади: спикерсиз палата бюджет бўйича қонунларни қабул қила олмайди. Бундан ташқари, телеканалнинг аниқлик киритишича, Украинани молиявий қўллаб-қувватлаётган Америка аҳолиси тобора камайиб бораётганида администрацияни қийин аҳволга солиб қўяди.
21 октябрь куни эрталаб Вакиллар палатаси овоз беришнинг учинчи босқичидан кейин яна янги спикерни сайлай олмади. 194 нафар республикачи Жим Жордан номзодини қўллаб-қувватлаган. Унинг рақиби, демократ Ҳаким Жеффрис эса 210 овоз олган. Спикерлик лавозимини эгаллаш учун камида 217 овоз тўплаш талаб этилади.
Энди Вакиллар палатаси 23 октябрь куни янги номзодларни муҳокама қилишга қайтади. Конгрессменлар 29 октябргача янги номзод кўрсатиши керак.
2022 йил февралидан бери АҚШ бошқа Ғарб давлатлари билан биргаликда Украинага ҳарбий ва молиявий ёрдам кўрсатмоқда. Вашингтон Киевни қурол-яроғ ва ўқ-дорилар билан таъминлайди. 15 октябрь куни АҚШ президентининг миллий хавфсизлик бўйича ёрдамчиси Жейк Салливан Қўшма Штатлар Украина ва Исроилга яна 2 миллиард доллардан ортиқ ёрдам ажратиш бўйича келишиб олишни режалаштираётганини айтди.
Изоҳ (0)