Farg‘ona viloyatida umumiy qiymati salkam 6 milliard so‘mga yaqin uyali aloqa vositalarining chetdan noqonuniy olib kirilishiga chek qo‘yildi. Bu haqda viloyat Bojxona boshqarmasi xabar berdi.
Qayd etilishicha, Farg‘ona viloyati bojxona boshqarmasi Kontrabandaga qarshi kurashish bo‘limi xodimlari tomonidan viloyat DXX va IIB xodimlari bilan hamkorlikda tezkor tadbir o‘tkazilgan. Tadbirda Farg‘ona—Toshkent yo‘nalishida harakatlanayotgan fuqaro boshqaruvidagi Cobalt rusumli avtotransport vositasi Namangan viloyatiga kirish maskanida to‘xtatilib, ko‘zdan kechirilgan.
Tekshiruv davomida vtotransport vositasining saloni va yukxonasida chetdan noqonuniy olib kirilayotgan, xorijda ishlab chiqarilgan hamda bojxona rasmiylashtiruvidan o‘tganini tasdiqlovchi hujjatlari bo‘lmagan dastlabki qiymati 5 milliard 788,9 million so‘mlik jami 24 turdagi 550 ga yaqin uyali aloqa vositalari borligi aniqlangan.
Telefonlarning aksariyatini iPhone 15 Pro, iPhone 15 Pro Max, Samsung Galaxy S23 Ultra, Samsung Galaxy S23 FE rusumidagi mobil aloqa vositalari tashkil etgan.
Mazkur holat yuzasidan tergovga qadar tekshiruv harakatlari olib borilmoqda.
Eslatib o‘tamiz, 2022-yilning avgustida Farg‘onada chetdan noqonuniy olib kirilayotgan 1 milliard so‘mlik telefonlar to‘xtatib qolingandi.
Izoh (0)