Toshkentda Bobur ko‘chasining Toshkent xalqaro aeroportidan Muqimiy va Nukus ko‘chalari bilan kesishmasigacha bo‘lgan qismida yo‘l ta’mirlash ishlari olib boriladi. Bu haqda poytaxt hokimligi matbuot xizmati xabar berdi.
Qayd etilishicha, ta’mirlash ishlari sabab yo‘lning bir tomoni 20-oktyabr kuni soat 10:00 dan 25-oktyabr kunigacha transport harakati uchun yopiladi. Har ikki yo‘nalishda harakatlanish yo‘lning ikkinchi tomonida amalga oshiriladi.
“Noqulayliklar uchun uzr so‘raymiz va haydovchilarga aylanma yo‘llardan foydalanishni tavsiya qilamiz”, — deyiladi xabarda.
Shuningdek, 20-oktyabr soat 06:00 dan 22-oktyabr 18:00 ga qadar Botir Zokirov ko‘chasining Alisher Navoiy va Islom Karimov shoh ko‘chalari oralig‘idagi yarmi ham yopiladi.
Eslatib o‘tamiz, tarmoq quvurlaridagi tamirlash ishlari tufayli 10-sentyabrdan 5-oktyabrgacha Muqimiy ko‘chasi qisman to‘sib qo‘yilgandi.
Izoh (0)