Farg‘onada chetdan noqonuniy olib kirilayotgan 1 milliard so‘mlik telefonlar to‘xtatib qolindi

Farg‘ona viloyatida Bojxona boshqarmasi xodimlari tomonidan o‘tkazilgan tezkor tadbirda 1 milliard so‘mlik telefonlarning mamlakat hududiga noqonuniy olib kirilishi rejasi fosh etildi. Bu haqda “Daryo”ga boshqarma axborot xizmati ma’lum qildi.

Ma’lum bo‘lishicha, viloyat Bojxona boshqarmasi Kontrabandaga qarshi kurashish bo‘limi xodimlari tomonidan Oltiariq tumani hududida tezkor tadbir o‘tkazilgan.

Tezkor tadbir davomida fuqaro A. boshqaruvidagi KIA rusumli avtomashina kuzatuvga olinib, Oltiariq tumani hududida to‘xtatilgan.

Shundan so‘ng avtomashina xolislar ishtirokida o‘rnatilgan tartibda ko‘zdan kechirilgan. Natijada mazkur avtomashina yukxonasida xorijda ishlab chiqarilgan hamda bojxona rasmiylashtiruvidan o‘tganligini tasdiqlovchi hujjatlari bo‘lmagan umumiy qiymati 1 milliard 4 million 450 ming so‘mlik 500 dona telefon borligi aniqlangan.

Ushbu holat yuzasidan bojxona organlari tomonidan tergovga qadar tekshiruv harakatlari olib borilmoqda.

Ma’lumot uchun, Farg‘ona viloyati bojxona boshqarmasi tomonidan joriy yilning o‘tgan davri mobaynida 9 ta holatda umumiy qiymati 2 milliard 600 million so‘mlik jami 2 ming 700 dan ziyod uyali aloqa vositalarining noqonuniy olib kirilishiga chek qo‘yilgan.