Namangan viloyati bojxona boshqarmasi va DXX xodimlari Pop tumanida bojxona nazorati o‘rnatilmagan aylanma yo‘llar orqali noqonuniy ravishda olib kirilgan tovar-moddiy boyliklarini aniqlash bo‘yicha tezkor tadbir o‘tkazdi. Bu haqda “Daryo” muxbiri Azizbek Abduvaliyev xabar bermoqda.
Tezkor tadbir davomida “Namangan—Toshkent” yo‘nalishida xarakatlanayotgan lacetti rusumli avtomashina haydovchisi Pop tumanidagi “Namangan” muntazam nazorat maskanida to‘xtatilib, xolislar ishtirokida ko‘zdan kechirilganida avtomashina salonidan xorijda ishlab chiqarilgan, hech qanday hujjatlari bo‘lmagan jami 1 milliard 516 million so‘mlik 11 turdagi 361 dona Samsung va Redmi rusumli uyali telefonlar borligi aniqlandi.
Mazkur jarayonda olingan ma’lumotlar asosida tezkor tadbir davom ettirilib, Yangiqo‘rg‘on tumani, “Mamay” mahallasida yashovchi fuqaroning xonadoni ham ko‘zdan kechirildi.
Bu yerda xorijda ishlab chiqarilgan va hujjatlari bo‘lmagan 3 turdagi 189 million so‘mlik 45 dona uyali telefon saqlab kelinayotganligi aniqlandi.
Mazkur holat bo‘yicha 14 turdagi jami 1 milliard 705 million so‘mlik 406 dona uyali telefon vaqtincha saqlovga olindi va surishtiruv harakatlari olib borilmoqda.
Mavzuga doir: Farg‘onada chetdan noqonuniy olib kirilayotgan 1 milliard so‘mlik telefonlar to‘xtatib qolindi
Izoh (0)