Украинада кенг кўламли уруш бошланганидан сўнг Қозоғистон Россияга 106 турдаги ҳарбий товарлар, жумладан, дронлар, чиплар, ихтисослаштирилган электроника ва бошқа маҳсулотлар экспортини чеклади, деди республика савдо ва интеграция вазири ўринбосари Қайрат Тўребаев Tengrinews’га.
“Асосий муаммо экспорт билан боғлиқ. Биз барча товарларни (Россия ҳудуди орқали) экспорт қиламиз. Фақат урушга оид товарлар экспорти чекланган”, — дейди у.
Баҳорда АҚШ Ғарбнинг Россияга киритган санкцияларини четлаб ўтишга уринишлар туфайли Қозоғистонни иккиламчи санкцияларга дучор бўлиш хавфидан огоҳлантирганди.
Қозоғистон Ташқи ишлар вазирлиги республика Ғарб санкциялари остига тушмаслик учун барча саъй-ҳаракатларини амалга ошираётганига ишонтирди. Президент Қосим-Жўмарт Тўқаев Россияга қарши санкцияларга “шак-шубҳасиз” амал қилишини, бу борада Ғарб давлатларида хавотир бўлмаслиги кераклигини таъкидлади.
Шу билан бирга, Қозоғистон раҳбари санкцияларни халқаро муносабатларни ўрнатиш нуқтаи назаридан самарасиз деб атади ва Қозоғистон “анти-Россия” эмаслигига ишонтирди. Бундай атама Россия президенти Владимир Путин томонидан 2021 йил июль ойида Украинага нисбатан қўлланган.
Изоҳ (0)