Toshkent shahridagi Singapur menejmentni rivojlantirish instituti rektori Ilhom Mamatqulov 600 nafardan oshiq talaba kursdan kursga o‘tishlarida muammoalar yuzaga kelayotgani aytilgan xabarlarga rasmiy munosabat bildirdi.
Qayd etilishicha, ushbu institutda taʼlim jarayonlari to‘liq xalqaro standartlar asosida tashkil etilishi bilan bir qatorda, talabalarning o‘quv jarayonlari davomida Buyuk Britaniya universitetlari taʼlim dasturlari asosida tasdiqlangan Akademik nizom talablariga to‘liq rioya etgan holda o‘qishlari talab etiladi.
Mazkur taʼlim tizimiga ko‘ra talabaga fanni o‘zlashtirish uchun jami 4 marotaba imkoniyat beriladi:
- Main Examination (semestr yakunida asosiy imtihon);
- Supplementary Examination (qayta topshirish imtihoni);
- Remodule main Examination (fanni o‘zlashtirish uchun keyingi o‘quv yilida qayta o‘qish va o‘quv jarayoni yakunida asosiy imtihon);
- Remodule supplementary Examination (qayta o‘qishga qolgan fandan qayta topshirish imtihoni).
Institutda bir yillik o‘quv shartnoma to‘lovi 32 million 256 ming so‘mni tashkil etadi. Qayta o‘zlashtirishga qolgan talaba faqatgina qayta o‘qiyotgan fani uchun to‘lovni amalga oshiradi. Ushbu imkoniyatlardan so‘ng ham talaba fanni o‘zlashtira olmasa, talabalar safidan chetlashtirilishi belgilangan.
“Ijtimoiy tarmoqlarda tarqalgan videoda qayta o‘zlashtirish imtihonlaridan o‘ta olmagan, shuningdek, o‘quv jarayonlari bilan bog‘liq boshqa masalalar yuzasidan markaziy ro‘yxatga olish va imtihon bo‘limiga murojaat qilgan talabalarni ko‘rish mumkin”, — deb yozadi Mamatqulov.
Videoda 600 nafardan ortiq ekani aytilgan talabalar Sanderlend universiteti taʼlim dasturi asosida TSMRIda bakalavr bosqichida tahsil olayotgan Akademik nizom talablariga rioya etmagan talabalar hisoblanadi.
2022/2023-o‘quv yilida Buyuk Britaniyaning Sanderlend universiteti taʼlim dasturi asosida 2313 nafar talaba tahsil olgan bo‘lib, shundan 532 nafari akademik nizom talablarini qo‘pol ravishda buzgan (kurs ishlarida meʼyordan ko‘p plagiat qayd etilishi –— plagiarism hamda ko‘chirmakashlik qilish yoki shpargalkalardan foydalanish holati — cheating).
Ushbu masala bo‘yicha Sanderlend universiteti akademik kengashi tomonidan har bir talaba holatiga individual yondashgan holda puxta o‘rganib chiqiladi va akademik huquqbuzarligi tahlil qilinadi. Hozirda hamkor universitetlar tomonidan olib borilayotgan o‘rganish natijalari to‘g‘risida bir necha kun ichida talabalarga maʼlum qilinadi.
“Talabalarning statuslari (fanni o‘zlashtirganlik holati) aniq bo‘lgunga qadar, vaqt yo‘qotmaslik maqsadida mazkur talabalar uchun alohida guruhlar tashkil etilib, ular tegishli fanlarga yo‘naltirildi. Hozirda talabalar o‘quv jarayonlarida ishtirok etishmoqda”, — deya ta’kidlanadi munosabatda.
Maʼlumot uchun, Buyuk Britaniya taʼlim standartlari asosida TSMRIda o‘quv mavsumi har yili oktyabr oyidan boshlanadi.
Izoh (0)