Тошкент шаҳридаги Сингапур менежментни ривожлантириш институти ректори Илҳом Маматқулов 600 нафардан ошиқ талаба курсдан курсга ўтишларида муаммоалар юзага келаётгани айтилган хабарларга расмий муносабат билдирди.
Қайд этилишича, ушбу институтда таълим жараёнлари тўлиқ халқаро стандартлар асосида ташкил этилиши билан бир қаторда, талабаларнинг ўқув жараёнлари давомида Буюк Британия университетлари таълим дастурлари асосида тасдиқланган Академик низом талабларига тўлиқ риоя этган ҳолда ўқишлари талаб этилади.
Мазкур таълим тизимига кўра талабага фанни ўзлаштириш учун жами 4 маротаба имконият берилади:
- Main Examination (семестр якунида асосий имтиҳон);
- Supplementаry Examination (қайта топшириш имтиҳони);
- Remodule main Examination (фанни ўзлаштириш учун кейинги ўқув йилида қайта ўқиш ва ўқув жараёни якунида асосий имтиҳон);
- Remodule supplementary Examination (қайта ўқишга қолган фандан қайта топшириш имтиҳони).
Институтда бир йиллик ўқув шартнома тўлови 32 миллион 256 минг сўмни ташкил этади. Қайта ўзлаштиришга қолган талаба фақатгина қайта ўқиётган фани учун тўловни амалга оширади. Ушбу имкониятлардан сўнг ҳам талаба фанни ўзлаштира олмаса, талабалар сафидан четлаштирилиши белгиланган.
“Ижтимоий тармоқларда тарқалган видеода қайта ўзлаштириш имтиҳонларидан ўта олмаган, шунингдек, ўқув жараёнлари билан боғлиқ бошқа масалалар юзасидан марказий рўйхатга олиш ва имтиҳон бўлимига мурожаат қилган талабаларни кўриш мумкин”, — деб ёзади Маматқулов.
Видеода 600 нафардан ортиқ экани айтилган талабалар Сандерленд университети таълим дастури асосида TСМРИда бакалавр босқичида таҳсил олаётган Академик низом талабларига риоя этмаган талабалар ҳисобланади.
2022/2023-ўқув йилида Буюк Британиянинг Сандерленд университети таълим дастури асосида 2313 нафар талаба таҳсил олган бўлиб, шундан 532 нафари академик низом талабларини қўпол равишда бузган (курс ишларида меъёрдан кўп плагиат қайд этилиши –— плагиарисм ҳамда кўчирмакашлик қилиш ёки шпаргалкалардан фойдаланиш ҳолати — cheating).
Ушбу масала бўйича Сандерленд университети академик кенгаши томонидан ҳар бир талаба ҳолатига индивидуал ёндашган ҳолда пухта ўрганиб чиқилади ва академик ҳуқуқбузарлиги таҳлил қилинади. Ҳозирда ҳамкор университетлар томонидан олиб борилаётган ўрганиш натижалари тўғрисида бир неча кун ичида талабаларга маълум қилинади.
“Талабаларнинг статуслари (фанни ўзлаштирганлик ҳолати) аниқ бўлгунга қадар, вақт йўқотмаслик мақсадида мазкур талабалар учун алоҳида гуруҳлар ташкил этилиб, улар тегишли фанларга йўналтирилди. Ҳозирда талабалар ўқув жараёнларида иштирок этишмоқда”, — дея таъкидланади муносабатда.
Маълумот учун, Буюк Британия таълим стандартлари асосида ТСМРИда ўқув мавсуми ҳар йили октябрь ойидан бошланади.
Изоҳ (0)