O‘zbekistonda Aholi sog‘lig‘ini saqlash kodeksi tasdiqlanadi

O‘zbekiston Respublikasining  Aholi sog‘lig‘ini saqlash kodeksini tasdiqlash to‘g‘risidagi qonun loyihasi e’lon qilindi.

Sog‘liqni saqlash vazirligi tomonidan ishlab chiqilgan ushbu kodeks loyihasi 2023-yil boshida jamoatchilik muhokamasi uchun taqdim etilgandi. Ushbu kodeks aholining malakali tibbiy xizmatdan foydalanishga bo‘lgan konstitutsiyaviy huquqini ta’minlash maqsadida sog‘liqni saqlash sohasidagi munosabatlarni tartibga soladi.

Qonun loyihasida qayd etilishicha, hozirgi vaqtda sog‘liqni saqlash tizimini tartibga soluvchi qonunchilikning tarqoqligi, qonunosti hujjatlarining ko‘pligi, ular o‘rtasida qarama-qarshiliklar va bo‘shliqlarning mavjudligi huquqni qo‘llash amaliyotida qiyinchiliklar tug‘dirmoqda.

Shunga ko‘ra, sog‘liqni saqlash sohasidagi qonunchilikni tizimlashtirish va kodifikatsiyalash, to‘g‘ridan to‘g‘ri amal qiladigan qonun hujjatini qabul qilish, buning evaziga tibbiyot sohasini qonunosti hujjatlari bilan tartibga solish hajmini qisqartirish, sog‘liqni saqlash sohasidagi xalqaro standartlarni va xorijiy mamlakatlarning eng yaxshi amaliyotini implementatsiya qilish zarurati mavjud.

Qonun, sog‘liqni saqlash sohasidagi milliy qonunchilikni takomillashtirish yo‘li bilan O‘zbekiston aholisiga tibbiy xizmatlar ko‘rsatish darajasini yuksaltirish, aholining sog‘lig‘ini saqlashga bo‘lgan huquqlarini ro‘yobga chiqarish, tibbiyot sohasi samaradorligini oshirish, tibbiyot xodimlarining javobgarligini kuchaytirish va himoyalanish darajasini kengaytirishga xizmat qiladi.

Aholi sog‘lig‘ini saqlash kodeksi uch bo‘lim, 21 ta bob, 199 ta moddadan iborat.