Central Asian University (sobiq Akfa) universitetida mojaro yuz berdi

Toshkentdagi Central Asian University universitetida (sobiq Akfa universiteti) ikki yillik tayyorgarlik kurslarini tamomlab, darhol ikkinchi kursga o‘qishga qabul qilingan talabalar bilan bog‘liq mojaro yuz berdi.

Ikki yil avval Akfa universitetiga o‘qishga kirgan talabalar ham bu borada “Daryo”ga murojaat yo‘lladi. Bildirilishicha, ular ertalabdan tush vaqtigacha maktabda 10—11-sinfda, kechgacha esa universitetda o‘qidi. Kelishuvga ko‘ra, ikki yil o‘qishni tugatib, imtihonlardan o‘tishganidan so‘ng, ularni universitetning 2-kursiga qabul qilishlari kerak edi. O‘tgan muddat ichida Akfa universiteti Central Asian University’ga aylandi, rahbariyat ham o‘zgardi.

“Endilikda yangi universitet rahbariyati 1-kursdan boshlab o‘qiysizlar deyapti. 2 yil davomida to‘lagan pulimiz ham qaytarilmas ekan. Qiziq jihati, ikki yil davomida o‘qigan fanlarimizni qayta o‘qir ekanmiz”, — deydi murojaat qilgan o‘quvchilardan biri.

“Gazeta.uz”ning yozishicha, universitetda 10—11-sinf o‘quvchilariga mo‘ljallangan Akfa University Part-Time Student kurslari bo‘lgan. Payshanba kuni ushbu kurslarni tamomlab, bu yil ikkinchi kursda o‘qishni boshlagan talabalar darslarga qo‘yilmagan. Ota-onalar kurslar uchun 40 million so‘m (yiliga 20 million so‘mdan) to‘laganlarini, shuningdek, shartnoma imzolab, o‘quv yili boshi uchun shartnoma summasining bir qismini to‘lab qo‘yganini ma’lum qilgan.

Central Asian University bayonoti

Holat yuzasidan universitet rasmiy bayonoti e’lon qilindi. Unda aytilishicha, ikki yil muqaddam Akfa universitetining sobiq rektori Bekzod Jalilov tomonidan ta’sischisidan yashirin holda, firibgarlik yo‘li bilan o‘ziga qo‘shimcha mablag‘ ishlash maqsadida Study for the success MCHJ tashkil etilgan. Amaldagi qonunlarga xilof yo‘l bilan ushbu kompaniya nomidan ota-onalar bilan shartnomalar tuzgan.

“Shartnomaga muvofiq ota-onalarga ularning farzandlari maktabning 10—11-sinflarida o‘qish bilan bir vaqtning o‘zida Akfa universitetining 1-bosqichini o‘qib tugatishi va maktabni bitirishi bilanoq universitetning 2-bosqichiga qabul qilinishi MChJ tomonidan va’da qilingan va ota-onalar ushbu xizmat evaziga MChJ hisob raqamiga muayyan to‘lovlarni qilishgan”, — deyiladi bayonotda.

Qayd etilishicha, Central Asian University MCHJning bank hisob raqami “O’zmilliybank” AJ Yashnobod filialida ochilgan. Study for the success MChJning bank hisob raqami esa Toshkent shahar Kapitalbank amaliyot boshqarmasida ochilgan. Shuningdek, MCHJning hisob raqamiga tushgan pul mablag‘lari Bekzod Jalilovning turmush o‘rtog‘iga tegishli bo‘lgan MCHJ tomonidan o‘zlashtirib yuborilgan.

“Biroq ushbu MChJning Akfa universitetiga hech qanday aloqasi yo‘q. O‘quvchilarni maktabda o‘qib turgan vaqtida universitet dasturlariga qabul qilish ham qonunchilikka zid. MCHJ ta’sis hujjatidan ko‘rinib turibdiki, u sobiq rektorning yaqin qarindoshi tomonidan ta’sis etilgan, kontakt ma’lumotlari ham unga tegishli, o‘zini banklarning birida alohida hisob raqamlari mavjud”, — deyiladi bayonotda.

Ta’kidlanishicha, ushbu ish yuzasidan huquqni muhofaza qiluvchi organlar, xususan tuman prokuraturasi tomonidan jinoiy ish qo‘zg‘atilgan bo‘lib, jabrlanuvchilar tuman prokuraturasiga tegishli shikoyat bilan murojaat qilishlari mumkinligi ma’lum qilingan.

Shuningdek, Bekzod Jalilovning qonunga xilof xatti-harakatlaridan jabrlangan va qo‘lida shahodatnomalari (11-sinf) bor bolalarni tez kunlarda, o‘rnatilgan tartibda universitetning 1-bosqichiga qo‘shimcha qabul qilishini ota-onalarga ma’lum qilgan.