Toshkentdagi Central Asian University universitetida (sobiq Akfa universiteti) ikki yillik tayyorgarlik kurslarini tamomlab, darhol ikkinchi kursga o‘qishga qabul qilingan talabalar bilan bog‘liq mojaro yuz bergandi. Oliygoh rahbariyati bunda sobiq rektor — Behzod Jalilovni ayblagandi. Behzod Jalilov bunga munosabat bildirib, qo‘yilgan ayblovlarni asossiz deb atadi.
O‘zi nima gap?
Universitetda 10—11-sinf o‘quvchilariga mo‘ljallangan Akfa University Part-Time Student kurslari bo‘lgan. 21-sentyabr kuni ushbu kurslarni tamomlab, bu yil ikkinchi kursda o‘qishni boshlagan talabalar darslarga qo‘yilmagan. Ota-onalar kurslar uchun 40 million so‘m (yiliga 20 million so‘mdan) to‘laganlarini, shuningdek, shartnoma imzolab, o‘quv yili boshi uchun shartnoma summasining bir qismini to‘lab qo‘yganini ma’lum qilgan.
Central Asian University rahbariyati o‘quvchilarni maktabda o‘qib turgan vaqtida universitet dasturlariga qabul qilishni qonunchilikka zid deb atadi. Shuningdek, Behzod Jalilov asos solgan Study for Success kompaniyasi universitet mablag‘larini noqonuniy o‘zlashtirishda ayblandi.
Behzod Jalilov munosabati
Uning bildirishicha, Study for Success 2015-yildan beri taʼlim xizmatlarini (litsenziya asosida) ko‘rsatib kelmoqda va talabalarni Toshkent shahridagi yetakchi oliy o‘quv yurtlariga o‘qishga tayyorlash bilan shug‘ullanadi.
2021-yildan boshlab Study for Success respublikaning boshqa ko‘plab taʼlim markazlari singari universitet bilan memorandum va hamkorlik shartnomasi asosida potensial talabalarni universitetga, jumladan, Part-time dasturi doirasida tayyorlagan hamda qabul imtihonlarini tashkil etgan.
“Yuqorida qayd etilgan hujjatlarga ko‘ra, Akfa universiteti International Foundation Diploma for Higher Education Studies dasturini (biz uni Part-time deb ataganimizdek) muvaffaqiyatli tamomlagan talabalarga birinchi bosqichni o‘qimasdan ikkinchi bosqichga qabul qilinishni kafolatlagan. Sababi mazkur tayyorgarlik kursi foundation year’ga tenglashtirilgan.
Akfa universiteti muassislari, jumladan, Jahongir Abidovich Ortiqxo‘jaevning o‘zi ham, taʼlim muassasasining boshqa ta’lim muassalari bilan hamkorligi haqida xabardor edi. Bundan tashqari, Jahongir Obidovichning jiyani Ortiqxo‘jaeva K. ham ushbu dasturda o‘qigan va o‘qish pulini universitet hisobiga emas, balki Study for Success MCHJ hisobiga to‘lagan. Yuqoridagilarni inobatga olsak, muassislar bundan bexabar edi, deyish noto‘g‘ri”, — deydi Behzod Jalilov.
Uning ta’kidlashicha, Akfa universiteti va boshqa o‘quv markazlari o‘rtasida ham Study for Success kompaniyasi bilan tuzilgan shartnomaga o‘xshash hujjatlar imzolangan. Shartnomalarga ko‘ra, ushbu o‘quv muassalarining kurslarini muvaffaqiyatli tamomlagan talabalar Akfa universitetining 2-bosqichiga qabul qilingan. Biroq yangi rahbariyat tomonidan o‘rnatilgan 2-bosqichga to‘g‘ridan to‘g‘ri o‘qishga qabul qilishni taqiqlash boshqa taʼlim muassasalaridan Part-time dasturi bo‘yicha universitetga kirgan talabalarga hech qanday tarzda qo‘llanmagan.
Behzod Jalilovning aytishicha, garchi yuridik maqomga ega va huquqiy tomondan rasmiylashtirilmagan bo‘lmasa-da, o‘zini kuzatuv kengashi raisi deb tanishtirayotgan Abdujabbor Abduvohidov bilan universitet boshqaruvi siyosatida yuzaga kelgan kelishmovchiliklar tufayli Akfa universiteti rektori lavozimidan ketgan. 2023-yil yanvar oyining birinchi yarmida ishdan ketgandan boshlab 2023-yilning 22-sentyabrga qadar universitetning yangi rahbariyati Part-time dasturi bo‘yicha o‘quv markazlari bilan hamkorlik bo‘yicha hech qanday eʼtiroz bildirmagan.
Qolaversa, mazkur talabalar 2023-yilning bahorgi semestrida universitet hududida hech qanday to‘siqlarsiz tahsil olishgan va semestr yakunida, yaʼni 2023-yil iyun oyida universitetning amaldagi rektori Kamron G‘ulomovning buyrug‘i bilan keyingi bosqichga o‘tkazilgan yoki 2-bosqichga o‘qishga qabul qilingan. Mazkur buyruq asosida Study for Success talabalari universitetning 2-bosqichiga o‘qishga qabul qilinganliklari to‘g‘risida xabardor qilingan.
22-sentyabr kuni bo‘lib o‘tgan ota-onalar bilan uchrashuvda, Kamron G‘ulomov bunday buyruq borligini avval rad etgan. Buyruq unga ko‘rsatilgach, u nimaga imzo qo‘yganidan xabari yo‘qligini aytgan. Keyinchalik esa, u buyruqqa imzo aldov yo‘li bilan olinganini aytgan.
“Aslini olganda, bu masalani yangi rahbariyat faqat mening obro‘mga, Study for Success obro‘siga va hozirda men faol ish olib borayotgan yangi universitet tashkil qilish bo‘yicha yangi loyihaning obro‘siga putur yetkazish uchun ko‘targan. Agar ularning ayblovlari mantiqiy va qonuniy asosli bo‘lsa, unda mantiqiy savol tug‘iladi: nega universitetning yangi rahbariyati ishdan bo‘shatilganimdan boshlab 2023-yil 22-sentabrgacha Part-time dasturini yopish va taʼlim markazlari bilan hamkorlikni to‘xtatish masalasini ko‘tarmadi?” — deydi Behzod Jalilov.
Uning qayd etishicha, 2022-yil noyabridan boshlab, shuningdek, ishdan bo‘shatilganidan so‘ng taʼsischi vakillari tomonidan tashqi ekspertlarni jalb qilgan holda universitet faoliyatida qayta-qayta audit, jumladan, moliyaviy audit o‘tkazilgan. Ushbu tekshiruvlar natijasida hech qanday qonunbuzarliklar aniqlanmagan.
Universitetda ishlab yurgan paytida Abdujabbor Abduvaxitov bilan o‘rtalarida tez-tez nizolar yuzaga kelgan. Shunday mojarolardan birida Abdujabbor Abduvohidov Behzod Jalilovga nisbatan behayo so‘zlarni ishlatib, hamkasblar oldida shaʼni va qadr-qimmatimni kamsitgan, hatto jismoniy zo‘ravonlik bilan tahdid qilgan.
Videosi internetda keng tarqalgan Central Asian Universityda 21-sentyabr kuni tashkil etilgan ota-onalar majlisida Abdujabbor Abduvaxitov ota-onalarni unga qarshi prokuraturaga ariza yozishga chaqirgan va xattotki ota-onalarni prokuraturaga olib borish uchun avtobus xizmatini tashkil qilgan. U, shuningdek, Behzod Jalilov tanishlariga, universitet xodimlariga va Akfa bosh ofisi xodimlariga meni jinoiy muassasaga (qamoqqa) joylashtirmaguncha tinchlanmasligini aytgan.
“Abdujabbor Abduvohidov o‘z aloqalaridan foydalanib, prokurorlarni menga nisbatan jinoiy ish qo‘zg‘atishga tom maʼnoda majburlagan. May oyida meni prokuratura soxta ayblov, yaʼni universitet mablag‘larini o‘g‘irlash bo‘yicha bir necha bor so‘roq qilishdi. Bu ayblovlar isbotini topmadi. Iyun oyida huquq-tartibot idoralari xodimlari mening diniy va siyosiy ekstremistik islomiy harakatlarga aloqadorligim yuzasidan tekshiruv o‘tkazdilar. Biroq bu ayblov ham tasdiqlanmadi”, — deydi Behzod Jalilov.
Uning ta’kidlashicha, Abdujabbor Abduvaxitovning yagona maqsadi uning obro‘yiga dog‘ tushirish, faoliyatga zarar yetkazishdir. Boshqalar ishga qabul qilinmasliklari uchun Abduvoxitov u haqida yolg‘on maʼlumotlar tarqatgan.
“Abdujabbor Abduvaxitovdan universitet rivojiga eʼtibor qaratishni, universitet nomi o‘zgarganligi sababli bekor qilingan litsenziyani qaytadan olishga, universitetning sobiq xodimlarining loyihalarini rivojlantirishga qarshi chiqib, zarar-kundalik bilan shug‘ullanmaslikni so‘rayman. Yodingizda bo‘lsin, xalqda juda dono naql bor: ‘Kim birovga choh qazisa o‘zi tushadi’. Men Abdujabbor Abduvaxitov menga qo‘yilgan asossiz barcha ayblovlar va haqoratlar uchun omma oldida kechirim so‘rashini talab qilaman”, — deydi Behzod Jalilov.
U, shuningdek, Shavkat Mirziyoyevdan O‘zbekiston hududida o‘zi va oilasi xavfsizligi taʼminlanishini so‘radi.
Izoh (0)