Hamshiralar akademiyasi faoliyatini tashkil etish chora-tadbirlari to‘g‘risida hukumat qarori loyihasi jamoatchilik muhokamasi uchun e’lon qilindi.
Unga ko‘ra, Hamshiralar akademiyasi Chilonzor Abu Ali ibn Sino nomidagi Jamoat salomatligi texnikumi negizida tashkil etiladi. Shuningdek, tibbiyot oliy ta’lim muassasalarida o‘qish muddati to‘rt yillik “oliy malakali hamshira” bakalavriat ta’lim yo‘nalishi bo‘yicha mutaxassislarni tayyorlash joriy etiladi.
Loyihaga ko‘ra, 2023/2024-o‘quv yilidan boshlab:
- o‘qish muddati ikki yillik birlamchi tibbiyot muassasalari uchun “Umumiy amaliyot hamshira”, “Patronaj hamshira”, “Tibbiy ijtimoiy ish”, “Tibbiy profilaktika ishi” xodimlari o‘qitiladi;
- o‘qish muddati uch yillik “Ixtisoslashgan hamshira”lar tayyorlanadi. Ixtisosliklari bo‘yicha “Feldsherlik ishi”, “Hamshiralik ishi”, “Funksional va laborator diagnostika ishi”, “Stomatologiya ishi”, “Farmatsiya” yo‘nalishlarida o‘qitiladi;
- o‘qish muddati 4 yillik tibbiyot OTMlarida “Oliy hamshiralik ishi” mutaxassislari tayyorlanadi, Bunda JSST tavsiyalariga ko‘ra, to‘rt yil o‘qigan hamshiralarga “Hamshiralik ishi bakalavri” (Bachelor of Nursing, BN) yoki “Hamshiralik ilmiy bakalavri” (Bachelor of Science Nursing, BSN) unvoni beriladi.
Oliy hamshiralik ishi magistratura (yo‘nalishlari bo‘yicha)da taʼlimini davom ettirish, keyinchalik mustaqil ilmiy izlanuvchi (PhD, DSc) sifatida faoliyat olib borish imkoniyati va ilmiy unvon va lavozimga ega bo‘lish huquqi beriladi
Shuningdek, sog‘liqni saqlash tizimi tashkilotlarining eng istiqbolli o‘rta tibbiyot xodimlari (hamshiralar, akusherlar, feldsherlar, amaliyotchi paramediklar, laborantlar)ning kamida 1000 nafarini 2 haftadan 1 oygacha bo‘lgan muddatga Janubiy Koreya, Turkiya, Yevropa mamlakatlari va boshqa rivojlangan xorijiy davlatlarga malaka oshirishga bosqichma-bosqich yuborish hamda xorijiy mutaxassislarni jalb etgan holda aralash (oflayn, onlayn) master klass, treninglar o‘tish bo‘yicha besh yilga mo‘ljallangan dastur ishlab chiqiladi.
Sog‘liqni saqlash vazirligi “El-yurt umidi” jamg‘armasi bilan hamkorlikda iqtidorli mutaxassislar hamda Hamshiralar akademiyasi professor-o‘qituvchilarini xorijiy davlatlarda malakasini oshirish choralarini ko‘radi.
Eslatib o‘tamiz, Hamshiralar akademiyasi tashkil etilishi haqida prezidentning 20-iyundagi “Ma’muriy islohotlar doirasida sog‘liqni saqlash sohasida davlat boshqaruvini samarali tashkil qilish chora-tadbirlari to‘g‘risida”gi qarorida belgilangandi.
Izoh (0)