Ўзбекистон Республикасининг Аҳоли соғлиғини сақлаш кодексини тасдиқлаш тўғрисидаги қонун лойиҳаси эълон қилинди.
Соғлиқни сақлаш вазирлиги томонидан ишлаб чиқилган ушбу кодекс лойиҳаси 2023 йил бошида жамоатчилик муҳокамаси учун тақдим этилганди. Ушбу кодекс аҳолининг малакали тиббий хизматдан фойдаланишга бўлган конституциявий ҳуқуқини таъминлаш мақсадида соғлиқни сақлаш соҳасидаги муносабатларни тартибга солади.
Қонун лойиҳасида қайд этилишича, ҳозирги вақтда соғлиқни сақлаш тизимини тартибга солувчи қонунчиликнинг тарқоқлиги, қонуности ҳужжатларининг кўплиги, улар ўртасида қарама-қаршиликлар ва бўшлиқларнинг мавжудлиги ҳуқуқни қўллаш амалиётида қийинчиликлар туғдирмоқда.
Шунга кўра, соғлиқни сақлаш соҳасидаги қонунчиликни тизимлаштириш ва кодификациялаш, тўғридан тўғри амал қиладиган қонун ҳужжатини қабул қилиш, бунинг эвазига тиббиёт соҳасини қонуности ҳужжатлари билан тартибга солиш ҳажмини қисқартириш, соғлиқни сақлаш соҳасидаги халқаро стандартларни ва хорижий мамлакатларнинг энг яхши амалиётини имплементация қилиш зарурати мавжуд.
Қонун, соғлиқни сақлаш соҳасидаги миллий қонунчиликни такомиллаштириш йўли билан Ўзбекистон аҳолисига тиббий хизматлар кўрсатиш даражасини юксалтириш, аҳолининг соғлиғини сақлашга бўлган ҳуқуқларини рўёбга чиқариш, тиббиёт соҳаси самарадорлигини ошириш, тиббиёт ходимларининг жавобгарлигини кучайтириш ва ҳимояланиш даражасини кенгайтиришга хизмат қилади.
Аҳоли соғлиғини сақлаш кодекси уч бўлим, 21 та боб, 199 та моддадан иборат.
Изоҳ (0)