Аннексия қилинган Қримни Краснодар ўлкаси билан боғловчи Қрим кўприги тўлиқ тикланди. Бу ҳақда Россия бош вазири ўринбосари Марат Хуснуллин маълум қилди.
“Бутун иш уч ойдан камроқ вақт олди. Шу вақт ичида иккита шикастланган оралиқ демонтаж қилиниб, янгилари ўрнатилди”, — деб ёзади Хуснуллин Telegramъда.
Унинг сўзларига кўра, кўприкни тиклаш ишлари белгиланган муддатдан 18 кун олдин якунланган. Автомобиллар ҳаракати барча тўрт қисмда ҳам очиқ.
Россия қўшинларининг Украинага кенг кўламли босқини бошланганидан бери Қрим кўпригида иккита портлаш содир бўлди — 2022 йил 8 октябрда ва 2023 йил 17 июлда. Портлашларни Украина хавфсизлик хизмати амалга оширган.
Биринчи портлашда тўрт киши ҳалок бўлганди, ўшанда кўприкнинг автомобиль қисмидаги оралиқлардан бири қисман қулаб тушган. Ҳодисадан кўп ўтмай Россия ФХХ ушбу ишда гумон қилинган 12 кишидан саккиз нафари ҳибсга олингани ҳақида хабар берди.
Кўприкда содир бўлган иккинчи портлаш оқибатида машинада бўлган эр-хотин ҳалок бўлди, уларнинг 14 ёшли қизи яраланди. Кўприкнинг автомобиль қисми ҳам шикастланди.
Изоҳ (0)