Italiya terma jamoasining ikki nafar futbolchisi totalizator bilan bog‘liq qoidalarni buzganlikda gumon qilinmoqda.
Avvalroq, “Yuventus” va Italiya terma jamoasi yarim himoyachisi Nikolo Fajoli noqonuniy totalizatorga aralashib qolishda ayblanib, so‘roq qilinayotgani xabar qilingandi. Tadbirkor Fabrisio Korona so‘roq paytida yana ikki nafar futbolchi: “Nyukasl” yarim himoyachisi Sandro Tonali hamda “Aston Villa” vingeri Nikolo Zaniolo ham bu ishga aloqadorligini aytib o‘tgan.
Politsiya xodimlari ikkala futbolchi bilan suhbatlashgan. Turin prokuraturasi ular bo‘yicha ham ish ochgan.
Italiya futbol federatsiyasi (FIGC) Tonali va Zaniolo terma jamoaning navbatdagi o‘yinlarini (Malta va Angliya) o‘tkazib yuborishini va ular o‘z klublariga qaytishini ma’lum qildi.
“Turin prokuraturasi terma jamoa bilan mashg‘ulot o‘tayotgan futbolchilar Sandro Tonali va Nikolo Zaniologa qarshi tergov hujjatlarini yubordi.
Ushbu futbolchilar yaqin kunlarda rejalashtirilgan majburiyatlarini bajarish holatida emasligi hisobga olinib, Federatsiya ularni himoya qilish uchun o‘z klublariga qaytishiga ruxsat berishga qaror qildi”, — deyiladi Italiya futbol federatsiyasi bayonotida.
Ma’lum bo‘lishicha, Fajoli sport kodeksining 24-moddasini buzgani uchun kamida 3 yillik diskvalifikatsiya, shuningdek, 25 ming yevro va undan ortiqroq jarimaga tortilishi mumkin.
Izoh (0)