Италия терма жамоасининг икки нафар футболчиси тотализаторга оид қоидаларни бузганликда гумон қилинмоқда. Прокуратура улар устидан иш очди

Италия терма жамоасининг икки нафар футболчиси тотализатор билан боғлиқ қоидаларни бузганликда гумон қилинмоқда.

Аввалроқ, “Ювентус” ва Италия терма жамоаси ярим ҳимоячиси Николо Фажоли ноқонуний тотализаторга аралашиб қолишда айбланиб, сўроқ қилинаётгани хабар қилинганди. Тадбиркор Фабрисио Корона сўроқ пайтида яна икки нафар футболчи: “Ньюкасл” ярим ҳимоячиси Сандро Тонали ҳамда “Астон Вилла” вингери Николо Заниоло ҳам бу ишга алоқадорлигини айтиб ўтган.

Полиция ходимлари иккала футболчи билан суҳбатлашган. Турин прокуратураси улар бўйича ҳам иш очган. 

Италия футбол федерацияси (FIGC) Тонали ва Заниоло терма жамоанинг навбатдаги ўйинларини (Малта ва Англия) ўтказиб юборишини ва улар ўз клубларига қайтишини маълум қилди. 

“Турин прокуратураси терма жамоа билан машғулот ўтаётган футболчилар Сандро Тонали ва Николо Заниолога қарши тергов ҳужжатларини юборди.

Ушбу футболчилар яқин кунларда режалаштирилган мажбуриятларини бажариш ҳолатида эмаслиги ҳисобга олиниб, Федерация уларни ҳимоя қилиш учун ўз клубларига қайтишига рухсат беришга қарор қилди”, — дейилади Италия футбол федерацияси баёнотида.

Маълум бўлишича, Фажоли спорт кодексининг 24-моддасини бузгани учун камида 3 йиллик дисквалификация, шунингдек, 25 минг евро ва ундан ортиқроқ жаримага тортилиши мумкин.