“Real” Zinedin Zidanni murabbiylik postiga qaytarish haqida o‘ylamoqda.
El Chiringuito jurnalisti Xose Alvaresning ma’lum qilishicha, madridliklar Karlo Anchelotti o‘rniga Zidanni munosib nomzod sifatida ko‘rmoqda. Qayd etib o‘tish joiz, Zidan 2021-yil may oyida “Real”ni tark etganidan buyon birorta klubga murabbiylik qilgani yo‘q.
Klub murabbiy bilan bog‘langan. Zidanni jamoaga olib kelishdan yana bir maqsad — u “PSJ” hujumchisi Kilian Mbappeni Madridga olib kela olishi. Chunki Zinedin va Kilianning aloqalari juda yaxshi.
Zidan murabbiylik faoliyati davomida faqatgina “qaymoqranglilar”da ishlagan — 2016-yildan 2018-yilga qadar, hamda 2019-yildan 2021-yilga qadar. Fransiyalik mutaxassis “Madrid” klubi bilan 3 marta Chempionlar Ligasida, 2 marta La Ligada zafar quchgan.
Eslatib o‘tamiz, “Real” bosh murabbiyi Karlo Anchelotti 2024-yildan boshlab Braziliya terma jamoasini boshqaradi.
Izoh (0)