Ҳиротда яна зилзила юз берди, уйлар қулаб тушди

Афғонистоннинг Ҳирот вилоятида яна кучли зилзилалар юз берди, деб хабар бермоқда “Дарё”нинг Афғонистондаги мухбири.

11-октябр, чоршанба куни эрталаб соат 05:12 атрофида Ҳиротда яна 6,3 магнитудали зилзила содир бўлди. Ер силкиниши Эроннинг Машҳад шаҳри, Афғонистоннинг Фараҳ, Нимрўз ва Бодғис вилоятларида ҳам сезилган.

Зилзила оқибатида Ҳирот шаҳрининг барча ҳудудларида электр энергияси узилиб қолган, уйлар қулаб тушган, одамлар вайроналар остида қолмоқда. Қурбонлар ҳақида маълумотлар аниқланмоқда.

Ҳиротнинг Работ Санги туманидаги Синжоб ва Банд Багҳарчер ҳудудларида ярим соатда кетма-кет учта кучли зилзила содир бўлди: биринчиси 6,3 магнитудали, иккинчиси 5,4 магнитудали, охиргиси 4,1 магнитудали зилзила, дейилади хабарда.

7-октябр куни Афғонистоннинг Ҳирот вилоятида 6,2 магнитудали зилзила қайд этилганди. Табиий офат оқибатида 2 ярим мингга яқин одам ҳалок бўлди.