Hisob palatasi matbuot xizmati Qoraqalpog‘istonda budjet mablag‘lari asossiz tarzda markazlashtirilgani haqida xabar berdi.
Ma’lum qilinishicha, Budjet kodeksining 26-moddasiga asosan mahalliy budjetlarning 2022-yildagi ijrosi to‘g‘risidagi hisoboti tashqi audit va baholashdan o‘tkazildi. Tashqi audit hamda masofaviy tarzda olib borilgan risk-tahlillarda kuzatilgan shubhali holatlar joyiga chiqqan holda Qoraqalpog‘iston Respublikasida o‘rganildi.
O‘rganishda Qoraqalpog‘iston Iqtisodiyot va moliya vazirligi tomonidan asossiz ravishda mablag‘larni xarajatlar smetasini shakllantirish jarayonida budjet tashkilotlariga ajratib bermasdan markazlashtirgan holda jamlab, keyinchalik boshqa yo‘nalishlarga qayta taqsimlangani aniqlangan.
Shuningdek, o‘tkazilgan o‘rganishda markazlashtirilgan mablag‘lardan tanlov asosida 102 milliard so‘mning sarflanishi tekshirilganda 14,2 milliard so‘mlik moliyaviy xato va kamchiliklar borligi aniqlangan. Jumladan, 71,2 milliard so‘mlik qurilish va ta’mirlash ishlarini bajarishda 7,5 milliard so‘mlik asossiz ortiqcha mablag‘lar olingan hamda sifatsiz ishlar bajarilgan bo‘lsa, 30,8 milliard so‘mlik asosiy vositalar va tovar-moddiy boyliklar 6,7 milliard so‘mga qimmat narxlarda xarid qilingan.
Hisob palatasi xabarida bildirilishicha, aniqlangan holatlar yuzasidan mas’ullarga qonunchilikda belgilangan choralarni ko‘rish va kelgusida yo‘l qo‘yilmasligi yuzasidan tegishli tadbirlarni amalga oshirish bo‘yicha Iqtisodiyot va moliya vazirligi, Qoraqalpog‘iston Respublikasi Vazirlar Kengashiga ko‘rsatma yuborildi.
Shuningdek, o‘rganish yuzasidan rasmiylashtirilgan hujjatlar huquqiy baho berish uchun Bosh prokuraturaga taqdim etildi.
Izoh (0)