Vazirlar Mahkamasining qarori bilan Kollej va texnikumlarda qurilish, transport, kommunal, qishloq xo‘jaligi va xizmat ko‘rsatish sohalaridagi kasb (mutaxassislik) bo‘yicha taʼlim olayotgan xotin-qizlarning to‘liq davlat granti asosida taʼlim olish tartibi to‘g‘risidagi nizom tasdiqlandi.
Qizlarning kollejlar va texnikumlarda taʼlim olishi uchun davlat granti mablag‘lari Respublika budjetidan ajratiladi. Bunda tizimida kollej va texnikumlar bo‘lgan vazirlik va idoralar budjet mablag‘larini taqsimlovchi sifatida ish yuritadi.
Kollej va texnikumlarga tegishli yo‘nalishlar bo‘yicha to‘lov-kontrakt asosida o‘qishga qabul qilingan qizlar 10-oktyabrga qadar o‘quv muassasasi direktori nomiga davlat grantini olish uchun ariza bilan murojaat qiladi.
Arizalar kollej va texnikumlar tomonidan 3 ish kuni ichida ko‘rib chiqiladi hamda oliy taʼlim, fan va innovatsiyalar hududiy bo‘linmalariga taqdim etiladi. Hududiy bo‘linmalar har yili 15-oktyabrga qadar umumlashtirilgan maʼlumotlarni ko‘rib chiqadi hamda Oliy taʼlim, fan va innovatsiyalar vazirligiga yuboradi.
Vazirlik har yili 20-oktyabrga qadar davlat granti asosida o‘qish uchun ariza bilan murojaat qilgan xotin-qizlar ro‘yxatini o‘z tizimida kollej va texnikumlar bo‘lgan vazirlik va idoralarga taqdim etadi. Vazirlik va idoralar qizlarning davlat granti asosida taʼlim olishlari uchun zarur mablag‘ ajratish yuzasidan 25-oktyabrga qadar Iqtisodiyot va moliya vazirligiga murojaat qiladi.
Iqtisodiyot va moliya vazirligi 5 ish kuni ichida tegishli mablag‘larni mazkur vazirlik va idoralarga ajratadi.
Kollej va texnikumlar direktorlari 2023/2024-o‘quv yilidan boshlab davlat granti asosida taʼlim oladigan xotin-qizlar uchun davlat budjetidan ajratiladigan mablag‘larning maqsadli va samarali sarflanishi uchun shaxsan javobgar hisoblanadi.
Hujjat Qonun hujjatlari maʼlumotlari milliy bazasida eʼlon qilingan va 2023-yil 3-oktyabrdan kuchga kirdi.
O‘zbekistonda 2023/2024-o‘quv yili uchun OTMlarning bakalavriat ta’lim yo‘nalishlariga kirish test sinovlari natijalariga ko‘ra 193 421 nafar abituriyent talabalikka tavsiya etilgandi. Test sinovi natijalariga ko‘ra talabalikka tavsiya etilgan abituriyentning 52 foizi erkaklar, 48 foizi esa ayollar hissasiga to‘g‘ri kelgan.
Izoh (0)