O‘zbekiston Milliy universiteti prorektori talaba qizning onasiga qo‘pollik qilgani aks etgan video tarqalib, ko‘plab muhokamalarga sabab bo‘lmoqda. Universitet matbuot xizmati holat bo‘yicha bayonot berdi.
Unga ko‘ra, ushbu holat 2023-yil sentyabr oyining birinchi o‘n kunligida ro‘y bergan. Murojaatchi ayol prorektor qabuliga kirgan. Qizi geologiya fakulteti 1-kursi kechki bo‘limga o‘qishga kirganini aytib, talabalar turar joyidan o‘rin ajratish va ish bilan taʼminlashni talab qilgan. Prorektor murojaatchiga kechki taʼlim shaklida tahsil oladigan talabalar uchun yotoqxona yetishmasligi, o‘rinlar kunduzgi taʼlim shaklida o‘qiydigan talabalarni qamrab olganini bildirgan. Murojaatchi tushunishni xohlamay, u holda ish bilan taʼminlab berasizlar, deb talab qo‘ygan. Prorektor agar imkoniyat topsak, maktablardan ish gaplashib beramiz, deb kerakli tavsiyalarni bergan. Ayol esa farzandiga universitetdan ish hal qilib berish talabini qo‘ygan.
Talablari to‘liq qanoatlantirilmagan ayol ketar chog‘ida universitet rahbariyati va prorektorni o‘rinsiz haqoratlab ketgan. Kurakda turmaydigan so‘zlar prorektorning nafsoniyatiga teggan va u ham ayolga nisbatan qo‘pol so‘zlarni ishlatgan. Shu vaziyat murojaatchi tomonidan yozib olingan va “prorektor murojaatchi ayolni haqorat qildi” degan maʼnodagi qismi tarqatilgan. Mazkur vaziyatga prorektor kotibasi, universitet xotin-qizlar qo‘mitasi raisi hamda qabuldagi fuqarolar guvoh bo‘lishgan.
Universitet prorektori bilan ro‘y bergan ushbu holatda adolatli qaror chiqarish yuzasidan tegishli organ tomonidan tekshirish ishlari olib borilmoqda. Vaziyat to‘liq o‘rganilib, holatga huquqiy baho berilgunicha hozirda videoda aks etgan prorektor o‘z vazifasidan vaqtincha chetlatildi va uning vazifalari universitetning boshqa masʼul prorektoriga yuklatildi.
“Tegishli tekshiruvlardan so‘ng prorektorga tashkiliy, intizomiy yoki maʼmuriy chora ko‘rish bo‘yicha yakuniy qaror qabul qilinadi.
O‘zbekiston Milliy universiteti yuzaga kelgan vaziyatdan tashvishda ekanini va keyinchalik bunday holatlarning oldini olish uchun tegishli choralar ko‘rilishini maʼlum qiladi”, — deyiladi xabarda.
Izoh (0)