O‘zbekistonda amaliy tashrif bilan bo‘lib turgan BMT Inson huquqlari bo‘yicha Oliy komissari Volker Turk sohada amalga oshirilayotgan ishlar bo‘yicha munosabatini bildirdi.
Ta’kidlanishicha, o‘tgan uch kun davomida uni iliqlik va mehmondo‘stlik bilan kutib olishgan, u davlat mansabdor shaxslaridan tortib, huquq himoyachilarigacha bo‘lgan keng doiradagi odamlar bilan ochiq va samimiy suhbatlar o‘tkazgan.
“Bugun ertalab prezident Shavkat Mirziyoyev bilan uchrashdim va u amalga oshirilayotgan islohotlarga batafsil to‘xtalib o‘tdi. O‘tgan olti yil ichida O‘zbekistonda o‘zgarishlar bo‘yicha ko‘p ishlar qilindi va men istiqboldagi sa’y-harakatlarda inson huquqlarini e’tibor markazida saqlashga bo‘lgan sadoqatiga yuqori baho berdim”, — deydi vakil.
Shuningdek, u O‘zbekiston mustaqillikka erishgandan so‘ng bu yerga kelganini, hozirda esa mamlakat butunlay o‘zgargan. Mutaxassis o‘zgarishlarni his qilish uchun Toshkent shahrida yon-atrofga qarashning o‘zi kifoya ekanini ta’kidlagan.
“O‘zbekistonga meros bo‘lib qolgan siyosiy tuzilmalar inson huquqlarini e’tiborga olmagan. So‘nggi olti yil ichida bu tubdan o‘zgardi. Prezident tashabbusi bilan amalga oshirilayotgan islohotlar keng ko‘lamli sohalarda muhim huquqiy islohotlarni o‘z ichiga oldi: paxta dalalarida majburiy mehnatga barham berish; 76 000 dan ortiq avval fuqaroligi bo‘lmagan shaxslarga fuqarolik berish; Suriya va boshqa yerlardagi lagerlardan 500 dan ortiq ayol va bolalarning qaytarib, olib kelish va qayta integratsiyasini ta’minlash. Men boshqa davlatlarni ham o‘rnak olishga chaqiraman”, — deydi Volker Turk.
Izoh (0)