Toshkentdagi bojxona omborida sodir bo‘lgan portlashda shikastlangan barcha BYD avtomobillari utilizatsiya qilishga yuboriladi. Bu haqda Xitoy ishlab chiqaruvchi kompaniyasi vakilligi xabar berdi.
Sergelidagi portlash vaqtida omborxona yaqinida bo‘lgan BYD elektromobillariga ham zarar yetgani tasvirlangan video e’lon qilingandi.
“Sizga shuni ma'lum qilamizki, barcha shikastlangan avtomobillar utilizatsiya qilishga yuboriladi, zero bu xavfsizlik va atrof-muhitni saqlash nuqtayi nazaridan muhimdir. Avtomobillarni yetkazib berish bo‘yicha barcha majburiyatlar shartnomada ko‘rsatilgan muddatlarda bajariladi”, — deyiladi xabarda.
Shu bilan birga, kompaniya portlash sabablari bo‘yicha surishtiruv ishlari olib borilayotgani va yakuniy ekspert xulosasi yo‘qligi sababli, hodisaga elektr transport vositalarining aloqadorligi yoki boshqa faktlar haqidagi ma’lumotlarni tarqatmaslikni so‘ragan.
Toshkent shahri Sergeli tumanidagi “Quruvchilar” dahasida Inter Logistics MCHJga qarashli omborxonada kuchli portlash va yong‘in 28-sentyabr kuni tunda sodir bo‘ldi. Hodisa oqibatida jabrlanganlarning umumiy soni 163 kishini tashkil etdi, bir nafar o‘smir hodisa oqibatida vafot etdi. Mazkur holat yuzasidan IIV Tergov departamenti tomonidan Jinoyat kodeksining 259-moddasi (yong‘in xavfsizligi qoidalarini buzish) 2-qismi “a” va ”b” bandlari bilan jinoyat ishi qo‘zg‘atildi.
Izoh (0)