Kanada bosh vaziri Jastin Tryudo Ukraina prezidenti Vladimir Zelenskiyning tashrifi chog‘ida SS faxriysi Yaroslav Gunkani parlament yig‘ilishiga taklif qilgani uchun mamlakat nomidan uzr so‘radi.
“Bu parlament va Kanadani qattiq sharmanda qilgan xato bo‘ldi. Jamoatlar palatasida bo‘lgan barchamiz o‘rnimizdan turib qarsak chalganimizdan chuqur afsusdamiz, biz kontekstni tushunmay shunday qildik”, — deya Tryudoning so‘zlaridan iqtibos keltirgan Kanada OAV.
Kanada bosh vaziri bu voqea Xolokost paytida halok bo‘lgan millionlab odamlar xotirasiga qarshi hurmatsizlik ekanini aytdi. U Kanada parlamentida SS faxriysini sharaflash yahudiylar, polyaklar va Ikkinchi jahon urushi paytida natsistlar rejimi tomonidan nishonga olingan boshqa guruhlar uchun “juda og‘riqli” ekanini tan oldi.
Tryudoning taʼkidlashicha, Kanada Gunkani olqishlayotgani suratga olingan Zelenskiydan ham kechirim so‘raydi, suratlar rossiyalik propagandistlar tomonidan turlicha talqin qilingandi. Bosh vazirning ta’kidlashicha, voqeaga javobgar — hozir iste’foga chiqqan Jamoatlar palatasi spikeri Entoni Rota.
“Eng katta diplomatik sharmandalik”
CBC News xabariga ko‘ra, Konservativ partiya yetakchisi Pyer Poilevr parlamentdagi voqeani mamlakat tarixidagi “eng katta diplomatik sharmandalik” deb ataganidan keyin bosh vazir uzr so‘rab chiqdi. Nashr manbalarining qayd etishicha, Tryudo parlament aʼzolaridan bo‘lib o‘tgan voqea haqida matbuot bilan gaplashmaslikni so‘ragan.
Vladimir Zelenskiyning 22-sentyabr kuni Kanadaga tashrifi chog‘ida Jamoatlar palatasi spikeri Entoni Rota 98 yoshli Yaroslav Gunkani parlament yig‘ilishiga taklif qildi. U “Ukraina mustaqilligi uchun va ruslarga qarshi kurashgan ukrain-kanadalik Ikkinchi jahon urushi faxriysi” sifatida tanishtirildi. Gunka olqishlar bilan kutib olindi.
Keyinchalik ma’lum bo‘lishicha, Gunka yahudiylarning ommaviy qotilligi va genotsidi bilan shug‘ullangan fashistlar bo‘linmasi — 14-Vaffen-SS grenador diviziyasida (Galisiya diviziyasi sifatida ham tanilgan) xizmat qilgan.
Voqea yahudiy tashkilotlari, Polsha, Rossiya va Germaniya vakillari hamda Kanada muxolifati tomonidan tanqid qilindi. 25-sentyabr kuni Rota bo‘lib o‘tgan ishlardan afsusda ekanini aytdi va kechirim so‘radi. Ertasi kuni u iste’foga chiqdi.
Izoh (0)