Rossiya prezidenti Vladimir Putin frontdagi vaziyat haqida haqiqiy ma’lumotga ega emas. Bu haqda Ukraina razvedkasi vakili anonimlik sharti bilan NV nashriga xabar berdi.
Ma’lum qilinishicha, bunga rossiyalik generallarga qarshi bir qator jinoiy ishlar qo‘zg‘atilgani sabab bo‘lgan. Bu Putinga jang maydonidagi salbiy xabarlarni yetkazmaslikka olib kelgan.
“Hech kim unga yomon xabar yetkazishga jur’at eta olmaydi. Shuning uchun Putin nima bo‘layotgani, ayniqsa jang maydonida kechayotgan voqealarning haqiqiy manzarasini tushunmaydi”, — dedi manba.
Mazkur holat Ukraina uchun ham ijobiy, ham salbiy ta‘sir ko‘rsatishi qayd etildi. Bungacha Amerika va Britaniya razvedkasi tegishli fikrni ilgari surgandi. Jumladan, Putinga Rossiya armiyasining haqiqiy yo‘qotishlari va G‘arb sanksiyalari oqibatlari haqida aytmasdan, ataylab noto‘g‘ri ma’lumot berilgan bo‘lishi mumkin.
AQSH buning uchun Rossiya prezidentining eng yaqin maslahatchilari javobgar bo‘lishi mumkinligini bildirgan.
NATO qo‘shma kuchlarining sobiq qo‘mondoni, iste’fodagi general Uesli Klarkning fikricha, Putin Rossiya harbiylari unga yolg‘on gapirayotganini biladi.
Izoh (0)