Xalqaro janjal: Kanada Hindistonni siyosiy qotillikda gumon qildi, Nyu-Dehli javob qaytardi

Kanada bosh vaziri Jastin Tryudo Britaniya Kolumbiyasi provinsiyasida sikx separatistik harakati yetakchisi Hardip Singx Nijarning o‘ldirilishida Hindiston rasmiylarining qo‘li bor bo‘lishi mumkinligini aytdi.

Hardip Singx Nijar Hindistonda mustaqil sikx davlati — Xalistonni tashkil etish tarafdori edi. Hindiston hukumati uni terrorchi deb hisoblagan. Nijar 18-iyun kuni Kanadaning Vankuver hududi yaqinida joylashgan Sarri shahridagi sikxlar ibodatxonasi yonida o‘ldirib ketilgan.

Reuters agentligining xabar berishicha, Tryudo 18-sentabr kuni parlamentga favqulodda murojaat qildi va unda Kanada huquq-tartibot idoralari Hindiston hukumati agentlari va Nijarning o‘limi o‘rtasidagi potentsial bog‘liqlikka oid “ishonchli da’volarni” qidirayotganini aytdi.

Agar Hindiston rasmiylarining qotillikka aloqadorligi haqidagi taxminlar tasdiqlansa, bu Kanada “suverenitetining buzilish” bo‘lishini ta’kidladi bosh vazir.

Tryudoning so‘zlariga ko‘ra, u yaqinda bo‘lib o‘tgan G20 sammiti doirasida Hindiston bosh vaziri Narendra Modi bilan Nijarning o‘ldirilishi holatlari haqida shaxsan gaplashgan.

Hindistonning qotillikka ehtimoliy aloqadorligi haqidagi da’volar fonida Kanada Hindiston razvedkasining yuqori martabali xodimini o‘z hududidan chiqarib yuborishini e’lon qildi.

Hindiston TIVning javobi

Hindiston Tashqi ishlar vazirligi mamlakatning Nijar o‘limiga aloqadorligi haqidagi taxminlarni “absurd” deb atadi. TIV tomonidan e’lon qilingan bayonotda, bosh vazir Modi Tryudo bilan suhbatda bu ayblovlarni “butunlay rad etgani” ta’kidlangan.

“Biz Kanada hukumatini o‘z tuprog‘ida harakatlanayotgan barcha antihind unsurlariga qarshi zudlik bilan va samarali qonuniy choralar ko‘rishga chaqiramiz”, — dedi Hindiston TIV.

Hardip Singx Nijar Hindistonda tug‘ilgan, ammo so‘nggi yillarda Kanadada yashagan va shu mamlakat fuqaroligini olgan. 2018-yilda Hindiston rasmiylari Nijarni sikx separatistlari tomonidan sodir etilgan ko‘plab qotilliklarga aloqadorlikda aybladi. U o‘z aybini qat’iyan rad etdi.

Hindiston Kanadaga yuborgan “terrorchilar ro‘yxati”da Nijarning ham ismi kiritilgan.