Burkina-Faso razvedka xizmatlari davlat to‘ntarishiga urinishning oldini oldi, deb xabar bermoqda mamlakat xuntasi, voqea 26-sentyabr kuni sodir bo‘lgan.
Bir necha ofitser va boshqalar hibsga olingan, isyonga aloqador qolgan odamlarni qidirish ishlari olib borilmoqda.
“Hukumat ayrim burkinaliklar, shu jumladan o‘z vatanini himoya qilishga qasamyod qilgan ofitserlar bunday sarguzashtga aralashganidan chuqur afsusda”, — deyiladi bayonotda.
Burkina-Fasoda o‘tgan yili ikki marta davlat to‘ntarishi sodir bo‘lgandi; hozirda mamlakatni kapitan Ibrohim Traore boshchiligidagi xunta boshqarmoqda.
Dastlab, yanvar oyida uchinchi harbiy okrug qo‘mondoni (poytaxt Uagaduguni o‘z ichiga oladi) Pol-Anri Damiba hokimiyat tepasiga kelib, fuqarolik davlat rahbari Roka Kaboreni lavozimidan chetlatgan va hibsga olgandi. Amaldagi rahbar Traore avvaliga yangi hokimiyatni qo‘llab-quvvatlagan, biroq keyinchalik Damibani terrorchilarga qarshi kurashdan ko‘ra ko‘proq siyosat bilan shug‘ullanganlikda ayblagan. Sentyabr oyining oxirida Traore boshchiligidagi bir guruh harbiylar Damiba ag‘darilganini e’lon qildi. Hukumat tarqatib yuborildi, Konstitutsiya faoliyati to‘xtatildi, chegaralar yopildi. O‘sha kunlarda odamlar Rossiya bayroqlari bilan ko‘chalarga chiqishdi.
Ma’lumot uchun, 2017-yildan beri dunyoda sodir bo‘lgan 17 davlat to‘ntarishidan faqat bittasi Afrikada emas, Osiyoda – Myanmada yuz bergan. Oxirgi uch yil ichida G‘arbiy Afrika davlatlarida yetti marta davlat to‘ntarishiga urinish bo‘lgan.
Izoh (0)