Соғлиқни сақлаш вазирлиги Жанубий Корея Эксимбанкининг Иқтисодий ривожланиш ва ҳамкорлик жамғармаси билан молиявий ҳамкорликда “Миллий онкология марказини барпо этиш” лойиҳасини амалга ошириш чора-тадбирлари тўғрисида”ги президент қарори лойиҳасини муҳокамага қўйди.
Ҳужжат билан Корея Республикаси Ҳукумати томонидан 2019 йил 27 июнда Корея Эксимбанкининг Иқтисодий ривожланиш ва ҳамкорлик жамғармаси (EDCF жамғармаси) томонидан “Миллий онкология марказини барпо этиш” лойиҳасини амалга ошириш учун Ўзбекистонга 10 йил имтиёзли давр билан 40 йил муддатга йиллик 0,1 фоиз ставкасида жами 127,5 миллион доллар эквивалентидан ошмайдиган Кореянинг вон пул бирлиги миқдорида имтиёзли қарз ажратилиши маъқулланади.
Шунингдек, Ўзбекистон ҳукумати ва EDCF жамғармаси ўртасида 2021 йил 31 декабрда лойиҳа юзасидан қарз битими имзоланган. Ўзбекистон Адлия вазирлиги имзоланган қарз битими бўйича белгиланган тартибда юридик хулоса тақдим этгани маълумот учун қабул қилинади.
Ўзбекистон Соғлиқни сақлаш вазирлиги EDCF қарзидан мақсадли фойдаланиш ҳамда лойиҳани самарали амалга ошириш учун масъул ижро этувчи орган, Ташқи иқтисодий фаолият миллий банки эса EDCF қарзи бўйича ҳисоб-китобларни амалга ошириш борасида молиявий агент ҳисобланади.
EDCF жамғармаси бўйича асосий қарз, унга ҳисобланган фоиз, воситачилик ҳақи ҳамда бошқа тўловларни қоплаш билан боғлиқ харажатлар Ўзбекистон бюджетидан қопланади. Лойиҳани амалга ошириш доирасида харид қилинадиган ва олиб кириладиган товарларга (хизматларга) тўланиши лозим бўлган қўшилган қиймат солиғи Ўзбекистон ҳиссаси сифатида белгиланган тартибда давлат бюджетидан тўланади (агар қонунчилик ҳужжатларида ушбу солиқ билан боғлиқ имтиёз назарда тутилмаган бўлса).
Иқтисодиёт ва молия вазирига Ўзбекистон номидан Соғлиқни сақлаш вазирлиги ва Ўзмиллийбанк (молиявий агент) ўртасида EDCF қарзидан фойдаланиш ва хизмат кўрсатиш бўйича агентлик битимини имзолаш ваколати берилади. Ўзмиллийбанкка EDCF қарзи бўйича ҳисоб-китобларни амалга ошириш учун Корея ваколатли банки билан банклараро шартномани имзолаш ваколати берилади.
Август ўрталарида Ўзбекистон ва Ҳиндистон Самарқандда замонавий саратон маркази ташкил этишни режалаштираётгани тўғрисида хабар берилганди. Шунингдек, мамлакатда тиббиётга ажратиладиган йиллик маблағ ҳажми икки баробар оширилиши айтилган эди.
Изоҳ (0)