Toshkent shahrida Milliy gvardiya xodimlari jinoyat sodir etgani uchun qidiruvga berilgan besh nafar shaxsni kuzatuv kameralari orqali aniqladi va qo‘lga oldi.
Qayd etilishicha, Yakkasaroy tumanidagi mehmonxonalardan birida qo‘riqlash bo‘limi xodimlari Toshkent shahar IIB xodimlari bilan hamkorlikda 43 yoshli M.A.ni qo‘lga olgan. U Jinoyat kodeksining 167-moddasi, yaʼni o‘zlashtirish yoki rastrata yo‘li bilan talon-toroj qilishda gumon qilinib, qidiruvga berilgan.
Yashnobod tumanidagi masjidda firibgarlikda gumon qilinib, qidiruvda bo‘lgan 49 yoshli K.M., Buxoro dehqon bozorida ham qidiruvda bo‘lgan 43 yoshli fuqaro X.O. qo‘lga olingan.
Shuningdek, Olmazor tumanidagi “Korzinka” supermarketi yonida qo‘riqlash xizmati xodimlari tomonidan firibgarlik sodir etgani uchun qidiruvda bo‘lgan T.S. ham ushlangan.
Bundan tashqari, Yunusobod tumanida tezkor guruh xodimlari tomonidan 2023-yilning avgust oyidan buyon huquq-tartibot idoralaridan yashirinib kelayotgan 21 yoshli fuqaro K.G‘. qo‘lga olingan.
Bundan oldin Toshkent shahrida Milliy gvardiya xodimlari firibgarlik uchun qidiruvga berilgan fuqaroni attraksionda qo‘lga olgani to‘g‘risida xabar berilgandi.
Izoh (0)