Toshkent shahar IIBB ijtimoiy tarmoqlarda poytaxt sudi binosiga bomba qo‘yib ketilgani aytilgan xabarlarga munosabat bildirdi.
Qayd etilishicha, poytaxtda joylashgan ayrim sud binolarida Toshkent shahar sudi, IIBB, Milliy gvardiya va boshqa huquqni muhofaza qiluvchi organ xodimlari bilan hamkorlikda o‘quv mashg‘ulotlari o‘tkazilmoqda.
Ta’kidlanishicha, bu kabi o‘quv mashg‘ulotlari shaharda tinchlik va osoyishtalikni taʼminlash, shuningdek, strategik obyektlarda xavfsizlik qoidalariga rioya etilishini tekshirish maqsadida rejali ravishda amalga oshiriladi.
“Hurmatli fuqarolar! Xavfsizlik qoidalariga rioya etishingizni va xavotirga berilmasligingizni hamda vaqtinchalik noqulayliklar uchun uzr so‘raymiz. Barcha harakatlar shahrimizning tinchlik va osoyishtaligini taʼminlash maqsadida o‘tkazilmoqda”, — deyiladi munosabatda.
Eslatib o‘tamiz, 2018-yil may oyida Toshkent shahrida amaliy-taktik maxsus o‘quv mashg‘ulotlari o‘tkazilgandi. Poytaxt IIBB unda fuqarolarni oldindan ogohlantirgan edi.
Izoh (0)