Тошкент шаҳар ИИББ ижтимоий тармоқларда пойтахт суди биносига бомба қўйиб кетилгани айтилган хабарларга муносабат билдирди.
Қайд этилишича, пойтахтда жойлашган айрим суд биноларида Тошкент шаҳар суди, ИИББ, Миллий гвардия ва бошқа ҳуқуқни муҳофаза қилувчи орган ходимлари билан ҳамкорликда ўқув машғулотлари ўтказилмоқда.
Таъкидланишича, бу каби ўқув машғулотлари шаҳарда тинчлик ва осойишталикни таъминлаш, шунингдек, стратегик объектларда хавфсизлик қоидаларига риоя этилишини текшириш мақсадида режали равишда амалга оширилади.
“Ҳурматли фуқаролар! Хавфсизлик қоидаларига риоя этишингизни ва хавотирга берилмаслигингизни ҳамда вақтинчалик ноқулайликлар учун узр сўраймиз. Барча ҳаракатлар шаҳримизнинг тинчлик ва осойишталигини таъминлаш мақсадида ўтказилмоқда”, — дейилади муносабатда.
Эслатиб ўтамиз, 2018 йил май ойида Тошкент шаҳрида амалий-тактик махсус ўқув машғулотлари ўтказилганди. Пойтахт ИИББ унда фуқароларни олдиндан огоҳлантирган эди.
Изоҳ (0)