Adliya vazirligi Jamoatchilik bilan aloqalar bo‘limi Xadicha Sulaymonova nomidagi Respublika sud ekspertizasi markazi, Senat huzurida mustaqil tashkilot sifatida qaytadan tashkil etilishi aytilgan xabarlarga munosabat bildirdi.
Qayd etilishicha, Adliya vazirligi huzuridagi X.Sulaymonova nomidagi Respublika sud ekspertiza markazi o‘z faoliyatini tegishli normativ-huquqiy hujjatlar asosida olib borib, hozirda Adliya vazirligining tarkibiy qismi hisoblanadi.
Bugungi kunda vazirlik tomonidan X.Sulaymonova nomidagi Respublika sud ekspertiza markazini boshqa tashkilotlar tarkibida, shu jumladan, Oliy Majlisi Senati huzurida qaytadan tashkil etishga oid normativ-huquqiy hujjat loyihalari ishlab chiqilmagan.
“Ijtimoiy tarmoq kanallari yurituvchilaridan yolg‘on va noxolis,tekshirilmagan axborotlarni jamoatchilikka tarkatish orqali fuqarolarimizda turli xil tushunmovchiliklarni keltirib chiqarishga yo‘l qo‘ymasliklarini so‘rab qolamiz”, — deyiladi munosabatda.
Vazirlik Maʼmuriy javobgarlik to‘g‘risidagi kodeksning 202-2-moddasiga ko‘ra yolg‘on axborotni tarqatish BHMning 50 baravari miqdorda jarima solishga sabab bo‘lishini eslatib o‘tgan.
Eslatib o‘tamiz, 2019-yilda “Sud-ekspertlik faoliyatini yanada takomillashtirish chora-tadbirlari to‘g‘risida”gi prezident qarori qabul qilingan. Qarorga muvofiq amaliyotda ilk bor nodavlat tashkilotlar tomonidan sud-ekspertlik faoliyatini amalga oshirishning huquqiy asoslari yaratilgan edi.
Izoh (0)