Samolyot bortida tartibni buzgan rossiyalik Toshkent aeroportida jarimaga tortildi. Bu haqda IIV Transport va turizm obyektlarida xavfsizlikni taʼminlash departamentiga tayanib, “Gazeta.uz” xabar berdi.
Qayd etilishicha, “Toshkent” xalqaro aeroportida HY-634 reysi bilan Sankt-Peterburgdan Toshkentga uchib kelayotgan Rossiya fuqarosi K.V. qo‘lga olingan.
“Erkak mast holda jamoat tartibini buzgan: behayo so‘zlarni ishlatgan, qo‘shiqlar kuylagan va xuddi shu reysda uchayotgan qizni haqoratlagan”, — deyiladi xabarda.
Toshkent aeroportlari qo‘riqlash bo‘limi inspektorlari unga nisbatan Maʼmuriy javobgarlik to‘g‘risidagi kodeksining 183-moddasi (mayda bezorilik) bilan bayonnoma tuzgan.
19-sentabr kuni Sergeli tuman sudi tomonidan maʼmuriy huquqbuzarlik to‘g‘risidagi ish ko‘rib chiqilib, unga nisbatan BHMning 3 baravari — 990 ming so‘m miqdorida jarima belgilandi.
Eslatib o‘tamiz, 13-yanvar kuni Rossiyaning Moskva — Bangkok yo‘nalishidagi reysni amalga oshirayotgan “Aeroflot” aviakompaniyasi samolyoti shoshilinch ravishda Samarqandga qo‘ngan, bunga homilador ayolning salomatligi yomonlashgani, shuningdek, bortda yuzaga kelgan janjal sabab bo‘lgan edi.
18-yanvar kuni esa “Aeroflot” kompaniyasi samolyoti Moskvadan Goaga uchayotgan vaqtida Urganchga qo‘ndirildi. AFL236 yo‘lovchi reysi Goa yo‘nalishi bo‘yicha uchayotgan vaqtda mast holatda zo‘ravonlik qilgan yo‘lovchi sabab Urganch xalqaro aeroportidagi muqobil aerodromga kelib qo‘ngan.
Izoh (0)