“Daryo”da “Yakkasaroydagi o‘zboshimchalik oqibati: daraxtlar kimyoviy modda bilan quritildi, avtomobil yo‘li va piyodalar yo‘lakchasi egallab olindi” sarlavhali maqola e’lon qilingandi. Qurilish va uy-joy kommunal xo‘jaligi vazirligi hamda Yakkasaroy tumani hokimligi mazkur maqolaga munosabat bildirdi.
.jpg)
Toshkent shahar Yakkasaroy tumani “To‘qimachilik” mahallasi Safdosh ko‘chasida joylashgan buyurtmachi Perfect universal service MCHJga tegishli savdo maishiy xizmat ko‘rsatish binosining qurilish obyekti loyiha-smeta hujjatlari Toshkent shahar Qurilish va uy-joy kommunal xo‘jaligi bosh boshqarmasi Arxitektura va shaharsozlik kengashi ishchi organi tomonidan 2023-yil 19-aprelda tegishli xulosa bilan kelishib berilgan. Ishlab chiqilgan ishchi loyihalarga “Tashgorekspert” MCHJ tomonidan 2023-yil 23-aprelda ijobiy yig‘ma ekspertiza xulosasi olingan.
Buyurtmachining 2023-yil 24-mayda Davlat xizmatlari agentligi orqali yuborgan arizasiga asosan o‘rnatilgan tartibda Toshkent shahar qurilish va uy-joy kommunal xo‘jaligi sohasida hududiy nazorat qilish inspeksiyasi ro‘yxatidan o‘tgan. Hozirgi kunda Toshkent shahar hokimining 2018-yil 17-sentabrdagi 1361-sonli qaroriga asosan qurilish obyektining hududini vaqtincha o‘rab turuvchi to‘siqlar o‘rnatilgan bo‘lib, qurilish-montaj ishlari boshlanmagan. Hududiy inspeksiya tomonidan esa shaharsozlik faoliyatiga oid qonun hujjatlariga zid ravishda qabul qilingan xulosani bekor qilish yuzasidan Toshkent shahar Qurilish va uy-joy kommunal xo‘jaligi bosh boshqarmasiga 2023-yil 14-sentabrda taqdimnoma kiritilgan hamda boshqarma tomonidan joriy yilning 15-sentabrida kengash yig‘ilishida 2023-yil 19-apreldagi 69918-sonli xulosa bekor qilinganini ma’lum qilamiz, — deyiladi Qurilish va uy-joy kommunal xo‘jaligi vazirligi bergan rasmiy axborotda.
Yakkasaroy hokimligining mazkur holat yuzasidan qo‘shimcha qilishicha, qurilish ishlari to‘xtatilishiga aholining noroziligi sabab bo‘lgan.
Shuningdek, qurilish ishlarini rejalashtirish jarayonida aholining noroziligini inobatga olib, aholi bilan kelishgan holda belgilangan tartib asosida qayta ko‘rib chiqilishi yuzasidan Toshkent shahar Qurilish boshqarmasi huzuridagi hududiy arxitektura-shaharsozlik kengashi yig‘ilishining 2023-yil 15-sentabrdagi 03-40/1-sonli bayonida ko‘rib chiqildi va 2023-yil 19-apreldagi 69918-sonli xulosa bekor qilindi, — deyiladi hokimlik munosabatida.
Qurilish vazirligi hamda Yakkasaroy hokimligi e’tiborini tortgan maqolada hududdagi daraxtlarga tarkibida neft mahsulotlari bo‘lgan suyuqlik quyilib, daraxtlarni nobud qilishga urinish bo‘lgani ochiqlangandi.
Izoh (0)