Istanbulda Turkiy davlatlar tashkiloti temiryo‘l maʼmuriyatlari rahbarlarining ikkinchi uchrashuvi bo‘lib o‘tdi, deb xabar bermoqda transport vazirligi matbuot xizmati.
Qayd etilishicha, 14-sentabr kuni o‘tkazilgan majlisda o‘zaro va umumiy hamkorlikning bir qator muhim masalalari muhokama qilindi.
Xususan, muhokama qilingan masalalardan biri 2022-yil dekabr oyida Turkiyadan O‘zbekistonga birinchi yuk yo‘nalishli poyezdi ishga tushirilgani bo‘ldi. Uchrashuv ishtirokchilari TDTning boshqa aʼzo davlatlar va kuzatuvchi davlatlar o‘rtasida shunga o‘xshash yo‘nalishli poyezdlarini tashkil etish bo‘yicha tashabbuslarini qo‘llab-quvvatladi.
Shuningdek, TDT doirasida iqtisodiy jihatdan samarali va o‘z vaqtida xalqaro temiryo‘l yo‘laklarini yaratish imkoniyatlari muhokama qilindi. Ishtirokchilar multimodal transport yo‘nalishlarini, xususan, Xitoy—Qirg‘iziston—O‘zbekiston temiryo‘l liniyasini rivojlantirish muhimligini taʼkidladi.
Ushbu yo‘lak TDTga aʼzo davlatlar va qo‘shni mintaqalar o‘rtasidagi savdo va iqtisodiy aloqalarni mustahkamlash uchun katta imkoniyatlarga ega. Shuningdek, TDT hududida muqobil, iqtisodiy jihatdan samarali va o‘z vaqtida xalqaro temiryo‘l yo‘laklarini yaratish imkoniyatlari muhokama qilindi.
Temiryo‘l infratuzilmasini strategik rivojlantirish va meʼyoriy-huquqiy bazani takomillashtirish ham muhokama mavzusiga aylandi. Uchrashuv ishtirokchilari muammolar va kamchiliklarni bartaraf etish, shuningdek, davlat-xususiy sheriklikni rivojlantirish bo‘yicha chora-tadbirlar ko‘rish zarurligi to‘g‘risida kelishib oldi.
- Ma’lumot uchun, 2022-yilning noyabrida Samarqandda bo‘lib o‘tgan Turkiy davlatlar tashkiloti prezidentlarining sammiti doirasida yangi transport tranzit koridorlarini yo‘lga qo‘yish va rivojlantirish bo‘yicha kelishuvga erishilgan edi.
- 2022-yilning dekabrida Turkiya—Eron—Turkmaniston—O‘zbekiston yo‘nalishida O‘zbekiston va Turkiya o‘rtasida yuklar tashishda eng tez va qulay yo‘nalishlardan biri ochilgandi.
Izoh (0)