Ijtimoiy tarmoqlarda Marg‘ilon shahar Ipakchilar buyum bozorida janjal bo‘lgani haqida videolar tarqaldi. Tasvirlarda o‘nlab fuqarolar janjallashayotgani, bir-birini qo‘lidagi qattiq jism bilan urgan holati aks etgan.
Voqea yuzasidan Farg‘ona viloyati IIB axborot xizmati boshlig‘i Ismoiljon Sharipov “Daryo”ga izoh berdi.
Maʼlum bo‘lishicha, 16-sentabr kuni fuqaro Sh.M. fuqaro R.R. da avvaldan qolib kelgan ish haqqini olish maqsadida telefonlashib, og‘zaki janjallashib ketgan. Shundan so‘ng ular Marg‘ilon shahar Ipakchilar buyum bozori hududida uchrashishga kelishishgan va R.R. o‘z tanishi Sh.X. bilan birga kelgan. Sh.M. ham sheriklari K.S., O.M., D.Yu. va D.M.lar bilan birgalikda kelishib o‘zaro janjallashib ketgan.
“Mazkur holat yuzasidan Marg‘ilon shahar IIB huzuridagi tergov bo‘limi tomonidan Jinoyat kodeksining 277 moddasi (bezorilik) 3-qismi “g” (jamoat tartibini saqlash vazifasini bajarib turgan hokimiyat vakili yoki jamoatchilik vakiliga yoxud bezorilik harakatlarining oldini olish chorasini ko‘rgan boshqa fuqarolarga qarshilik ko‘rsatish) bandi bilan jinoyat ishi qo‘zg‘atilib, fuqaro R.R. protsessual tartibda ushlangan”, — deyiladi viloyat IIB axborotida.
Qo‘shimcha qilinishicha, holat viloyat IIB tomonidan nazoratga olingan.
Maʼlumot uchun, Jinoyat kodeksining 277 moddasi (bezorilik) 3-qismi “g” (jamoat tartibini saqlash vazifasini bajarib turgan hokimiyat vakili yoki jamoatchilik vakiliga yoxud bezorilik harakatlarining oldini olish chorasini ko‘rgan boshqa fuqarolarga qarshilik o‘rsatib sodir etilgan bo‘lsa — uch yildan besh yilgacha ozodlikni cheklash yoxud uch yildan besh yilgacha ozodlikdan mahrum qilish bilan jazolanadi.
Mavzuga doir:
Izoh (0)