Andijon viloyati hokimi Shuhrat Abdurahmonov 9-sentabr kuni “Viloyatda jamoat transportini rivojlantirish hamda yo‘lovchilar transportida yo‘lovchilar tashish haqining yangi tarifini belgilash to‘g‘risida”gi qarorni imzoladi.
Qaror bilan Andijon shahri hamda shahar atrofi yo‘nalishlarida yo‘lovchilar tashish haqining yangi tariflari belgilandi. Andijon shahrida yo‘lkira avtobus qatnovlari uchun naqd yoki bank kartasidan to‘langanda 2000 so‘m, ATTO transport kartasi bilan to‘langanda esa 1500 so‘m, yo‘nalishli taksi xizmatidan foydalanganda esa 3000 so‘m etib belgilandi.
Shahar atrofi yo‘nalishlarida esa bir yo‘lovchi kilometr uchun avtobuslarda 150 so‘m, yo‘nalishli taksi (mikroavtobus)larda 245 so‘m, yo‘nalishli taksi (Damas)larda 300 so‘m etib belgilandi. Mazkur qaror rasmiy e’lon qilingandan so‘ng kuchga kiradi. “E-qaror” yagona elektron tizimida qaror bilan tanishgan “Daryo” muxbiri hujjat qabul qilinganiga oradan bir hafta o‘tgan bo‘lsa-da, nega e’lon qilinmaganligi bilan qiziqdi.
Viloyat hokimligi axborot xizmati rahbari Muslimbek Ibrohimov topshiriq hujjatlar “E-xat” tizimi orqali tushirilishini aytib, shaxsan qarordan bexabarligini bildirdi. Biroq ayni shu yo‘nalish bo‘yicha ishlayotgan axborot xizmatining xodimi e’lon qilgan bo‘lishi kerakligini ta’kidladi.
Hokimlik axborot xizmati bosh mutaxassisi Ozodbek Jabborov esa ayni paytda ushbu qaror e’lon qilish uchun tayyorlanayotganini bildirgan. Vaholanki, mazkur qaror qonunchilikka muvofiq umum majburiy bo‘lib, normativ-huquqiy hujjat hisoblanib, “Normativ-huquqiy hujjatlar to‘g‘risida”gi qonunining 38-moddasiga muvofiq “O‘zbekiston Respublikasi qonunchilik ma’lumotlari milliy bazasi” yoki mahalliy davlat hokimiyati organining rasmiy nashrida e’lon qilinishi kerak edi. Bundan tashqari qonunning 40-moddasida, shuningdek, qarorning 8-bandida rasmiy e’lon qilingan kundan e’tiboran kuchga kirishi qayd etilgandi.
Viloyat hokimligi axborot xizmati nega bunday sustkashlikka yo‘l qo‘ydi? Nahotki hokimlik qabul qilayotgan qarorlar bilan doimiy tanishib bormasa? Nafaqat hokimlik axborot xizmati, balki boshqa xodimlar ham “Normativ-huquqiy hujjatlar to‘g‘risida”gi qonundan xabardormi?
Ushbu material tayyorlanish jarayonida qaror Andijon viloyati hokimligining rasmiy telegram kanalida e’lon qilindi.
Izoh (0)